Saltanatty sharanyń moderatory, jýrnalıstıka fakýltetiniń dekany Sansyzbaı Mádıev eńbek jolyn qatardaǵy tilshilikten bastap, joǵary laýazymdy jaýapty qyzmetterge deıin atqarǵan Nurtileý Imanǵalıulynyń shyǵarmashylyq jolynan syr shertetin fotokórmemen tanystyryp, ómir tarıhynyń kezeńderi týraly baıandady.
Alǵashqy sóz tizginin alǵan Aqparat jáne qoǵamdyq damý mınıstri A.Balaeva bul uıymdastyrylǵan sharanyń eń aldymen, ózi baqılyq bolsa da, sońynda úlgi bolatyn isi qalǵan jýrnalıstıka sardarynyń rýhyna qurmet kórsetý ekenin erekshe atap ótti. Ekinshiden, baspasóz júıriginiń esimi berilgen bul aýdıtorııanyń stýdentter úshin de mańyzy zor ekenine toqtaldy. Osynda bilim alatyn árbir stýdenttiń jýrnalıst aǵalarynyń esimin kirletpeı, laıyqty deńgeıde oqıtynyna senim bildirdi. «Nurtileý Imanǵalıuly ǵumyrynyń 35 jylyn televızııaǵa arnap, túrli baǵdarlamalar aıasynda 4000-nan artyq habar júrgizgen tynymsyz tulǵa boldy. Ol tek saýatty telejúrgizýshi ǵana bolǵan joq, qazaq televızııasynda ózindik mektep qalyptastyra bildi. О́zine qarap boı túzegen jas jýrnalıster qatarynan qanshama býyn shákirt tárbıeledi. О́miriniń sońyna deıin jýrnalıstıkaǵa adal qyzmet etti. Túrli habarlarǵa qatysyp, oı-pikirin bildirip júrdi. О́z kásibine degen adaldyq, jýrnalıstıkaǵa degen qurmet osylaı kórinedi» dedi Aıda Balaeva.
QazUÝ rektory J.Túımebaev ta tereń bilimimen, izdenimpazdyǵymen bıik belesterdi baǵyndyrǵan maıtalman jýrnalıstiń kásibı qyry men adamgershilik tulǵasy týraly keńinen áńgimeledi. «Nurtileý Imanǵalıulyn Qazaqstanda bilmeıtin, tanymaıtyn adam joq. «Baı-qýatty bolaıyq!» degen qanatty sózdiń avtory sanaly ǵumyrynyń jarty ǵasyryn televızııaǵa arnady. Naǵyz jýrnalıst qaıda júrse de, qolynan qalamy túspeıtin, jańalyqtyń jarshysy, halyq pen bıliktiń arasyndaǵy altyn kópir. El men jer, memleket pen ult degende jan aıamaı eńbek etken Nurtileý Imanǵalıulynyń ǵıbratty ǵumyry sonyń naqty dáleli. Ýnıversıtetimizdegi «Qazaqstan» ulttyq arnasynyń oqý zerthanasy endi Nurtileý Imanǵalıulynyń ardaqty esimimen atalyp, telejýrnalıstıkaǵa qanat qaqqan shákirtterdiń ustahanasy bolatynyna senemin» dedi ýnıversıtet rektory J.Túımebaev.
Keń ári jaryq, bolashaq telejýrnalısterdi ázirleýge kerekti quraldarmen jabdyqtalǵan aýdıtorııada «Nurtileý Imanǵalıuly degen kim? Onyń ult rýhanııaty aldynda qandaı eńbegi bar?» degen suraqqa tolyqtaı jaýap beretin málimetter molynan jınaqtalǵan.
«Qazaqstan» ulttyq arnasynyń atynan Almaty bólimshesiniń jetekshisi, belgili jýrnalıst Sáýle Jırenshına N.Imanǵalıulynyń óz avtorlyq baǵdarlamalarynda paıdalanǵan qamshysy men asyqtaryn zerthanaǵa tabys etti. «TV – meniń búkil ǵumyrym, tirshiligimniń bastaý-bulaǵy, taǵdyrymnyń tumary, birde shaıqalǵan, endi birde shalqaıǵan kóńilimniń syńary, qyraǵy, ómirimniń shyraǵy» degen Nurtileý Imanǵalıuly týraly birge qyzmet istep, ómirdegi sáýleli sátterin birge bólisken áriptes zamandastary, jary Qarlyǵash Sovetbekqyzy, belgili BAQ ókilderi, ýnıversıtet ustazdary men stýdentterdiń esteligi, negizinen, bir arnaǵa toǵysyp, óz kásibin jaýapkershilikpen minsiz atqarǵan bilikti tulǵany súısine de, saǵyna da eske aldy.
