«Áleýmettik jelilerde AI-92 markaly benzınniń boljamdy baǵasy 240 teńge, dızel baǵasy 400 teńge bolatyny kórsetilgen janarmaı quıý stansııalary jelisiniń qujaty tarap jatyr. Bul boljam qanshalyqty ras? 2022 jyly baǵa qandaı bolady?», dep surady BAQ ókilderi.
Energetıka vıse-mınıstri Áset Maǵaýov aqparattyq bıýlletendi áleýmettik jeliden kórip, kompanııaǵa habarlasqanyn aıtty.
«Bul hat eki aıdan beri áleýmettik jelilerde tarap jatyr. Kompanııa óz tutynýshylary úshin osyndaı boljamdar jasap, kommersııalyq usynys jasaǵanyn aıtty. Iаǵnı, bul sharýashylyq sýbektileri men naryqty baǵalaý arasyndaǵy qarym-qatynas.
Meniń oıymsha, dızel 400 teńgeden bolmaıdy. Negizinde qazir baǵanyń birshama tómendegenin kórip otyrmyz», dedi Maǵaýov.
Ol naqty baǵa munaı baǵasyna baılanysty bolatynyn jáne boljaý qıyn ekenin túsindirdi.
«Biz ishki naryqtaǵy baǵalarǵa áser etetin belgili bir korrelıasııany kórip otyrmyz. Sebebi dızel otynyn ımporttaýdy jalǵastyramyz. Biraq qazan-qarashadaǵydaı iri kólemde emes. Qazir ımport kólemi tómendedi, biraq jalpy baǵalarmen korrelıasııa bar», dedi ol.
Benzın baǵasy boıynsha, vıse-mınıstr naqty jaýap bergen joq.
«Qazaqstan qazir benzınge qatysty ózin qamtamasyz etedi. Dızel boıynsha bıyl aıtarlyqtaı ımport ótti. Benzın boıynsha, ishki qajettilikterimizdi jabamyz, keıin bári benzın tutyný qanshalyqty ósetinine baılanysty bolady. Biz benzın boıynsha bırjalyq saýda júrgizemiz, bul naryqtyq ındıkator. Kúrt ósý úrdisin kórip otyrǵan joqpyz», dedi Maǵaýov.
Biraq ol Qazaqstanda 2022 jyly AI-92-niń lıtri 240 teńgege jetýi múmkin be degen suraqqa jaýap bermedi.
