Kezdesý barysynda taraptar óńirlik jáne halyqaralyq kún tártibindegi asa mańyzdy máseleler jóninde pikir almasty.
Elbasy Reseı Federasııasynyń Prezıdentine JEEK-tiń qurmetti tóraǵasy retinde TMD-ǵa qatysýshy elder kóshbasshylarynyń beıresmı sammıtine qatysýǵa shaqyrǵany úshin alǵys aıtty.
«Qurmetti tóraǵa retinde men búgin beıresmı kezdesýge qatysamyn. Men 1991 jylǵy jeltoqsanda Almatyda TMD-nyń qurylýyna alyp kelgen tarıhı oqıǵanyń az ǵana kýágerleriniń birimin. Munyń qalaı bolǵany áli esimde», dedi Nursultan Nazarbaev.
Sonymen qatar, Qazaqstannyń Tuńǵysh Prezıdenti osy ıntegrasııalyq birlestiktiń tıimdiligi men ózektiligimen qatar, EAEO-ny odan ári damytýdyń mańyzdylyǵyn atap ótti.
«EAEO ornyqty jáne kóptegen adamdar buǵan senedi. Álemdegi pandemııaǵa qaramastan, Qazaqstan men Reseı arasyndaǵy saýda kólemi 24 mıllıardty quraıdy. Bul barlyq jyldardaǵy rekord. Bizdiń mindetimiz - EAEO-ny odan ári damytý, qaýymdastyrylǵan músheler men baıqaýshylardy qabyldaý. Jańa qatysýshylarǵa bul paıdaly ekenin dáleldeý. О́ıtkeni, konsensýs negizinde jumys isteıtin bul birlestik onyń barlyq músheleriniń quqyqtary men múddelerine nuqsan keltirmeıdi», dedi Elbasy óz sózinde.
Vladımır Pýtın óz kezeginde Qazaqstannyń Tuńǵysh Prezıdentiniń EAEO qurýǵa jáne Eýrazııalyq kontınentte ekonomıkalyq ıntegrasııany odan ári damytýǵa qosqan jeke úlesin erekshe atap ótti.
«Qazir pandemııa, búkil álemde óndiris deńgeıiniń tómendeýi óte qıyn jaǵdaıda, biz óz ýaqytymyzda sizdermen birge jumys istegen tetikter men quraldar tıimdi jumys isteýde. Qazaqstanmen ózara qarym-qatynastarda biz 2020 jyly, pandemııanyń eń qıyn jylynda ekonomıkanyń eleýli quldyraýyna jol bermedik dep aıtý jetkilikti. Al bıylǵy jyldyń alǵashqy toǵyz aıynda ósim 30 paıyzdan asty. Bul, árıne, Qazaqstannyń qazirgi basshylyǵymen birlesken qyzmetimizdiń óte mańyzdy nátıjesi», dedi Vladımır Pýtın.
