Jumyr jerdiń tórt tarabyn meken etken jahan jurtynyń bir bólshegi – qazaq qoǵamy danalyqtyń dánin jas býynnyń sanasyna sebýdi kózdegen Abaıdyń armanyn áli de tolyq túsinbeı keledi. Adamdyq aınasyna qylaýdaı daq túsirmeýdi oılaǵan ár pende dara danyshpan meńzegen tolyq adam deńgeıine jetý úshin «Talap, eńbek, tereń oı, qanaǵat, raqym, oılap qoı» dep anyq aıtylǵan bes asyl isti týra joldan adastyrmaıtyn temirqazyqtaı qaǵıdasyna balaǵany jón edi. Dál qazir osy qaǵıda, ásirese qazaq qoǵamyna aýadaı qajet-aq.
Teginde «Ystyq qaırat, nurly aqyl, jyly júrek» dep esti adam esinde ustar úsh-aq qasıetti dáldikpen anyqtap bergen uly Abaıdyń esimin ulyqtap, rýhyn asqaqtatar qurmetke shekteý bolmaýy kerek. О́ıtkeni dara danyshpannyń eńseli eskertkishi ár aýylda, ár qalada boı kóterip, esimi jas býyn bilim alatyn mektepter men ortalyqtarǵa berilse, jarasyp-aq turmaı ma? Máselen, Atyraý oblysynda Abaı Qunanbaıulynyń esimimen atalatyn 5 mektep pen 28 kóshe bar. Byltyr oıshyldyń esimi jańadan boı kótergen oqýshylar men jastar saraıyna berilip, nysan ataýy Abaı ortalyǵy bolyp ózgertildi.
Qazir bul ortalyqta 30 baǵytty qamtıtyn 100-ge jýyq úıirme ashylǵan. Úıirmelerde 800-ge jýyq oqýshy óner, shyǵarmashylyq, tehnologııa, kórkem-estetıka, sport, áskerı-patrıottyq, ekologııa-bıologııa baǵytynda qosymsha bilim alady. Endi, mine, Abaıdyń eńseli eskertkishi uly aqynnyń aty berilgen ortalyqtyń aldyna qoıyldy. Bıiktigi 11 metrdi quraıtyn eskertkishti músinshi Asqar Nartov qoladan quıǵan.
Danalyqtyń bıik shyńyna shyqqan uly Abaıdyń bul eskertkishi «О́sek, ótirik, maqtanshaq, erinshek, beker mal shashpaq» deıtin bes dushpannan kem túspes teris áreketten arylmaı júrgenderdi oılandyra ala ma?..
Atyraý oblysy
