Eriktiler arasynda sportshylar, dárigerler, kásipkerler, muǵalimder jáne volonterler bar. Olardyń bári tártip saqshylarymen birge tártipsizdiktiń jáne zańsyzdyqtyń aldyn alý úshin erikti túrde nıet bildirdi.
«Elimizde ne bolyp jatqanyn bárimiz kórip otyrmyz. Beıbit sherýler jappaı tártipsizdikke, zorlyq-zombylyqqa, urlyqqa ulasty. О́z qalamyz, elimiz úshin alańdap otyrmyz. Sol sebepti qalamyzda qandaı da bir zańsyzdyq, tártipsizdik bolmas úshin judyryqtaı jumylyp otyrmyz», dedi kásipker Álibek Muqataev.
Eriktiler arasynda nıet bildirgenderdiń basym bóligi – sportshylar. Rıngte, tatamıde Qazaqstan namysyn qorǵap úırengen bilekti jigitter búgin kúsh qurylymdarymen birge memlekettik mańyzy bar nysandardy, sol sııaqty qalanyń tynys-tirshiligine jaýapty kásiporyndardy kúzetetin bolady.
«Qoǵamdyq tártipti saqtaý úshin qansha ýaqyt qajet bolsa da barymyzdy salyp kómektesetin bolamyz. Arandatýshylar, tártipsizdikti uıymdastyrýshylar, sol sııaqty osyndaı qıyn kezeńde ózgeniń esebinen óz paıdasyn tabýǵa umtylatyndar ózderine kúshti qarsylyq baryn bilýi tıis. Biz polıseılerdiń tasasynda tyǵylyp otyrmaımyz», dedi aralas jekpe-jekten álem chempıony Eldar Qudaıbergenov.
Belsendi Azat Ábikenovtiń aıtýynsha óz úıińdi tonap, tóńkerý – patrıottyqtyń belgisi emes. Azat óz sózinde destrýktıvti is-áreketti aqtap alýdyń esh qısyny joq ekenin aıryqsha aıtyp ótti.
«Búgin qala turǵyndary men qonaqtaryn qorǵaý úshin jınaldyq. Biz professııaǵa nemese konfessııaǵa bólinbeımiz. Biz elin kez kelgen jaýdan qorǵaıtyn er-azamat retinde jınaldyq. Qalamyzda beıbitshilikti saqtap qalý úshin qolymyzdan kelgenniń bárin jasaımyz», dedi ol.
