Sonyń bir belgisin Taldyqorǵan qalasy boıynsha qoǵamdyq kóliktiń qatynaı bastaǵanynan kórýge bolady. Almaty oblystyq jolaýshylar kóligi jáne avtomobıl joldary basqarmasy habarlaǵandaı, oblys ortalyǵyndaǵy baǵyttar boıynsha 7 tasymaldaýshy mekemeniń 82 avtobýsy jumysqa shyqqan. Qoǵamdyq kólik tańerteńgi saǵat 8.00-men keshki 18.00 aralyǵynda júredi.
Sondaı-aq oblys ákimdiginde óńirdegi qalypty ómir súrý jaǵdaıyna kezeń-kezeńimen kóshý máselesi pysyqtaldy. Oblys ákimi Qanat Bozymbaev jıyn ótkizip, onda Prezıdent jarııalaǵan Jalpyulttyq aza tutý kúnine oraı qaza bolǵandardy bir mınýt únsizdikpen eske aldy. Jıynda oblys aýmaǵynda shtattyq rejimdegi jumysqa kóshý týraly tapsyrmalar berildi.
– Oblysta keltirilgen shyǵyndardy esepteý komıssııasy jumysyn bastady. Kommýnaldyq júıelerdiń úzdiksiz jumysyn qamtamasyz etýdi jalǵastyramyz. Sol sııaqty saýda nysandary, iri bazarlar, janar-jaǵarmaı beketteri tolyqtaı iske qosylýy tıis. Bul rette osy nysandardyń baǵany ósirmeýi qatań baqylanady. Qazir qalada ınternet jelisi iske qosyldy. Endi kommýnaldyq tólemderdi qabyldaý, zeınetaqy, járdemaqy tólemderi de kedergisiz júrgizilýi kerek, – dedi óz sózinde Q.Bozymbaev.
Qazir aımaqtaǵy aýrýhanalar men dárihanalardyń jumysy jandanǵan. Onda dári-dármek qory jetkilikti, qalypty rejimde jumys istep tur. Sol sııaqty Taldyqorǵan qalasynda qoǵamdyq kólik tolyq jumysqa kiristi. Oblystyń túkpir-túkpirine Almaty qalasynan júıeli túrde azyq-túlik jetkizý úrdisi úzilgen joq. Sonymen birge jıynda polısııa jáne arnaıy organdar qyzmetkerlerine jaǵdaı jasaý, olardy materıaldyq turǵyda qoldaý, turǵyn úımen qamtý, shtat sanyn ulǵaıtý sııaqty birqatar keshendi sharalar jobasyn usyný jaıy aıtyldy.
– Jalpy, oblystaǵy ahýal turaqty. Taldyqorǵan qalasy tolyq baqylaýda. Sondyqtan qalypty ómirge birte-birte kóshýimiz kerek. Judyryqtaı jumylyp, birge jumys istesek, jýyq arada oblystaǵy sharýashylyq jumystaryn, jetisýlyqtardyń ómir súrý saltyn burynǵy qalpyna keltire alamyz dep oılaımyn, – dedi aımaq basshysy Q.Bozymbaev.
Almaty oblysy
