Aımaqtar • 12 Qańtar, 2022

269 búlikshi ustalyp, 20 qylmystyq is qozǵaldy

Jambyl oblysynda jaǵdaı turaqty. Ahýal óńirde qurylǵan jedel shtabtyń qatań baqylaýynda. Qazirgi kezde Taraz qalasynda oryn alǵan terrorlyq shabýylǵa tosqaýyl qoıylyp, on shaqty qarýly qylmyskerdiń kózi joıylǵan.

Hamıt ESAMAN

Sonymen qatar 269 búlikshi ustalyp, 20 qylmystyq is qozǵalǵan. Sondaı-aq 104 ákimshilik is qozǵalýda. Jalpy, qaqtyǵys saldarynan 15 adam qaza tapty. Onyń ishinde 2 azamat quqyq qorǵaý organdarynyń qyzmetkeri bolsa, 13 adam jappaı tártipsizdikke qatysýshylar bolyp otyr. Al oblys ákimdigin órtegen belsendi 4 adam ustalyp, 2 kalashnıkov avtomaty tárkilengen.

Qarýlanǵan topqa qarsy polısııa departamenti, Ulttyq qaýipsizdik komıtetiniń oblys boıynsha departamenti men «Ońtústik» óńirlik áskerı qolbasshylyǵynyń 2 myńnan astam qyzmetkeri men 100-den astam arnaıy tehnıkasy jumyldyrylǵan. Búlikshilik kezinde 283 adam dárigerler kómegine júgingen bolsa, búginde 42 adam aýrýhanada jatyr. Temir jol vokzalynda túngi saǵat 23:00-den keıin poıyzdan túsetin jolaýshylardy arnaıy kezekshi avtobýstar tasymaldaıdy. Búginde qylmyskerlerdi ustaý, jedel izdestirý sharalary jalǵasýda. Oblys boıynsha 29 blok-beket jumys istep tur. Onyń ishinde Taraz qalasynyń kiris-shyǵys qaqpalaryna 10 blok-beket qoıylǵan. Oblys, qala aýmaǵyna kirip-shyǵatyn barlyq kólikter tekserilýde.

Oblys ákimi Berdibek Saparbaev Memleket basshysy Qasym-Jomart Toqaev júktegen tapsyrmalardy baqylaýǵa alý, onyń oryndalý barysyn tekserý maqsatynda jıyn ótkizdi. Tıisti basshylarǵa zardap shekken nysandardy qalpyna keltirý, kólikter shyǵynyn esepteý boıynsha naqty tapsyrmalar berdi. Sonymen qatar óńirdegi jappaı tártipsizdikke shamamen 2 myńǵa tarta adam qatysqanyn, ázirge 269 búlikshi ustalǵanyn, basqa da belsendilerdi ustaý boıynsha sharalardy jedeldetý qajettigin aıtty. «Arandatýshylar men kúdiktilerdi anyqtaý boıynsha aýdan, aýyldyq ákimdikter men polısııa ınspektorlary belsendi áreket etýi tıis. Kúndelikti málimetterdi shtab otyrysynda saralap otyrmyz. Halyqty jylý, sý, gaz, jaryqpen qamtýda eshqandaı másele bolmaýy kerek. Prezıdenttiń tarıfterdiń, janar-jaǵarmaıdyń, gazdyń jáne azyq-túliktiń baǵasyn kótermeý, qajetti qoryn qalyptastyrý boıynsha tapsyrmalary oryndalýy tıis. Ásirese áleýmettik mańyzdy taýarlardyń jetkilikti bolýyn, baǵasynyń óspeýin baqylaýda ustańyzdar», dedi B.Saparbaev.

Jambyl oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz