SQO densaýlyq saqtaý basqarmasy baspasóz qyzmetiniń málimetinshe, búgin oblystyq perınataldyq ortalyqta egiz bala dúnıege keldi. Merziminen buryn týǵanymen shaqalaqtardyń da, anasynyń da jaǵdaıy jaqsy.
Jalpy bıyl 4 qańtardan bastap oblysta osymen besinshi egiz dúnıege kelip otyr. Qalǵan jaǵdaılarda júkti kelinshekter aıy-kúni jetip, ómirge deni saý nárestelerin ákeldi.
«Bala týý kórsetkishi tómen óńirlerdiń biri sanalatyn bizdiń oblys úshin bul – qýanyshty jaǵdaı. Demografııamyz jaqsarady. 2020 jyly ómirge 68 egiz, 1 úshem kelgen. Byltyr 58 egiz jáne bir úshem týdy. Bıyl búginge deıin 143 sábı dúnıe esigin ashsa, sonyń ony egiz. Analardyń da, balalarynyń da jaǵdaılary jaqsy, aldy úılerine shyǵaryldy», deıdi SQO densaýlyq saqtaý basqarmasynyń baspasóz hatshysy Gúlnar Qalıeva.
