El shetine indet jetken 2020 jyly 7 247 adam dertke dýshar bolsa, 2021 jyly bul kórsetkish 6 esege ósip, 42 434-ke deıin jetken. Al jyl basynan beri 353 adam indetti juqtyryp úlgeripti. Indettiń etek alý sebepterin áldeneshe ret jazdyq. О́ńirde toı-tomalaq, as tyıylmady. Halyqtyń eti úırenip ketken bolýy kerek, saqtyq sharalary da saqtala bermeıdi.
– Pandemııalyq ahýal turaqty. «Jasyl aımaqtamyz». Úmit artqan vaksınalaý óz nátıjesin berýde. Jappaı ekpe egýdiń nátıjesinde COVID-19 indetin juqtyrǵandar sany 5 esege azaıdy. Máselen, ótken jyldyń tamyz aıynda 8 334 adam dertke shaldyǵyp, naýqastardyń 1 425-i stasıonarlarǵa jatqyzylsa, jeltoqsan aıynda indetti juqtyrǵan 1 622 turǵynnyń 200-i aýrýhanadan em aldy, – deıdi oblystyq densaýlyq saqtaý basqarmasynyń basshysy Narıman Syzdyqov.
Búgingi tańda jansaqtaý bóliminde jatqandardyń sany kemidi. Bul rette indet juqtyrýshylardyń qatary azaıýmen birge aýrýhanalardaǵy tósektik oryndardyń da qysqarǵanyn aıta ketý kerek. Naqty derekterge júginsek, óńirdegi aýrýhanalarda 1 myńnan astam tósektik oryn qysqartyldy. Jansaqtaý bóliminde de 56 oryn azaıtylǵan. Degenmen indet ýshyǵyp ketse, qosymsha 3 myń tósektik oryn daıyn. О́tken jyldyń aqpan aıynan bastap 300 myńnan astam aqmolalyq ekpe saldyrsa, 25 399 adam úshinshi márte ekpe alǵan. Al Pfizer vaksınasynyń eki komponentin de 2 143 adam alyp úlgergen. Oblystyq densaýlyq saqtaý basqarmasynyń máli-
metine qaraǵanda, ótken jyly jalpy quny 6,2 mlrd teńge kólemindegi dári-dármek jetkizilgen. Onyń 99,9 paıyzy paıdalanylǵan.
– Elde jarııalanǵan tótenshe jaǵdaı kezinde tegin bosatylatyn dári-dármekterdi óńirge jetkizýge eshqandaı kedergi bolyp otyrǵan joq. Naýqastardyń basym bóligi tegin dárilermen qamtamasyz etilýde. Qorda da tegin dári-dármektiń kólemi jetkilikti, – dedi N.Syzdyqov.
Budan basqa, quqyq qorǵaý organdarynyń málimetterine súıensek, ótken jyly dári-dármekterdi jetkizý, tıisti deńgeıden baǵasyn asyrmaý baǵytynda tekseris jumystary júrgizilgen. Tekseris barysynda oblys ortalyǵynda baǵany belgilengen shekten negizsiz ósirgen bir dárihana anyqtalyp, 1 856 815 teńge kóleminde ákimshilik aıyppul salyndy. Farmasevtıkalyq naryqqa baqylaý júrgizý jumysy áli de jalǵasa beredi.
Aqmola oblysy
