Jeke isterdi zerdeleý kezinde áskerge shaqyrylýshylardyń saýalnama derekteri naqtylanady, árbir adammen, onyń ata-anasymen áńgimelesedi. Áskerge shaqyrylýshylardyń mamandyqtary mindetti túrde eskeriledi, sondaı-aq, olardyń moraldyq jáne iskerlik qasıetteri, densaýlyq jaǵdaıy, dene bitimi, jalpy bilimi, arnaıy daıarlyǵy jáne otbasylyq jaǵdaıy týraly aqparat qaralady.
Ákimshilik nemese qylmystyq jaýapkershilikke tartylǵan, tergeýde júrgen, zańsyz qoǵamdyq birlestikterdiń nemese dástúrli emes dinı aǵymdardyń músheleri retinde arnaıy esepte turǵan adamdarǵa erekshe nazar aýdarylady.
Aldyn ala qarastyrý jumystary áskerdiń qandaı da bir túrlerinde qyzmet etýge daıyn jastardyń sapalyq quramyn anyqtaýǵa múmkindik beredi. Densaýlyq jaǵdaıy boıynsha shaqyrtýdan bosatý jaǵdaılary tekseriledi.
«Kún saıyn jergilikti áskerı basqarý organdarynyń shaqyrý pýnktterine 800-900-ge jýyq adam keledi. Áskerge shaqyrylatyn jastaǵy 90 myńnan asa adam qaralady», dedi Qarýly Kúshter bas shtabynyń Uıymdastyrý-jumyldyrý jumysy departamenti bastyǵynyń orynbasary polkovnık Aıan Eslıamov.
Jergilikti áskerı basqarý organdary Qarýly Kúshterge, Ulttyq qaýipsizdik komıtetiniń Shekara qyzmetine, Memlekettik kúzet qyzmetine jáne Ulttyq ulanǵa shaqyrtý boıynsha jumys isteıdi. Bıyl 17 000-ǵa jýyq adam kóktemde áskerge shaqyrylady, olardyń 6500-den astamy Qarýly Kúshterdiń bólimderi men bólimshelerinde qyzmet etedi.
