Rýhanııat • 26 Qańtar, 2022

Áleýmettik ádildik birlikke bastaıdy

915 ret kórsetildi

Jaqynda bir úlken shyǵarmashylyq uıym­­nyń bedeldi basshysymen pikir alys­­qanymyzda, ol búgingi elimizdiń ba­­syn­daǵy syn kezeń jaıly oılaryn orta­ǵa sala kelip: «Memleket basshysy Qasym-Jomart Toqaev áý bastan usta­nyp kele jatqan áleýmettik ádildik qa­ǵı­daty halqymyzdy birlikke bastaıtynyna senemin. Oǵan ózim basqaryp otyr­ǵan ujymnyń mysalynda kámil kóz jet­kizdim», degen edi.

Sol sóziniń astarynda qandaı syr jatqanyn sýyrtpaqtap surap bilsem, ol osy shyǵarmashylyq uıym basshylyǵyna taǵaıyndalǵan kezde ujymda qalyptasqan moraldyq ahýal tym kináratty bolǵan eken. Eldiń ár óńirinen jınalǵan qyzmetkerler top-topqa bólinip, bir-birimen sálemdesýden de qalyp bara jatypty. Munyń sebebi – bu­rynǵy basshy ujymdy alalap, ózi shyq­qan óńirden kelgenderdi ashyqtan-ashyq qolpashtaı bergeninde eken. Syıaqynyń sú­belisin, marapattyń salmaqtysyn jer­les­terine áperip, ózgelerdi ógeısitip, qyz­met­ker­lerdiń arasynda pendeshilik pysh-pysh áńgime órbip, syrtqa da tarap jatýyna ózi sebepshi bolypty. Jańa basshy izasharynyń jibergen qateliginen birden tıisti qorytyndy shyǵaryp, ujymdy bólip-jarmaı, bárin teń ustaýǵa tyrysqannan keıin ondaǵy jaǵymsyz jaǵdaı birtindep túzelip, yń-shyńsyz, naǵyz shyǵarmashylyq ahýal ornyqqan.

Rasynda da, memleketimizde de áleýmettik ádildik, zańnyń ústemdigi saltanat qursa, halqymyzdyń ál-aýqaty áldeqaıda jaqsaryp, birligi de nyǵaıa túseri haq. Prezıdentimizdiń saılaýaldy baǵdarlamasynyń «Barshaǵa ortaq ıgilik! Sabaqtastyq. Ádildik. О́r­leý» atalǵandyǵy bekerden-beker emes. «Ádildik – mádenıetimizdiń ajyramas bó­li­­gi jáne ǵasyrlar boıy qalyptasqan qun­dylyǵymyz. Ultyna, dinı nanymyna, tur­mystyq jaǵdaıyna qaramastan, bar­lyq azamattardyń quqyǵynyń teńdigi týraly Konstıtýsııa qaǵıdasy – meniń ju­my­symnyń basty baǵdary. Meniń minde­tim – ár otandasymyzdyń jeke tabysqa jetýine jáne óziniń ál-aýqatyn arttyrýyna jańa múmkindikter týǵyzý», dep qadaı aıtqan bolatyn Qasym-Jomart Toqaev.

Sodan beri Memleket basshysynyń tike­leı tapsyrmalaryna sáıkes atqarylǵan jáne qolǵa alynǵan ıgilikti ister az emes. Sonyń ishinde halyq densaýlyǵy jolynda, ásirese koronavırýs indetimen kúres kezinde ýaqytpen sanaspaı, janqııarlyqpen eńbek etip júrgen dárigerler men el bolashaǵy – jas urpaq tárbıesine jaýapty muǵalimderdiń jalaqylary eleýli mólsherde arttyryldy, eń tómengi jalaqy deńgeıi 60 myń teńgege deıin kóterildi. Endi, mine, el bıliginiń tizginin óz qolyna tolyq alǵan Memleket basshysy qoǵamymyzda áleýmettik ádildikti qamtamasyz etý úshin birqatar mańyzdy sheshim qabyldap, jańa Úkimetke nar­dyń júgindeı zor jaýapkershilik artyp otyr. Jaqynda otandyq iri bıznes ókil­de­riniń qatysýymen bolǵan kezdesýde: «Ulttyq tabystyń ádil bólinýi boıynsha teńgerimsizdik pen problemanyń bar ekeni aıdan anyq. Halyqaralyq sarapshylar (KPMG, 2019 jyl) Qazaqstan baılyǵynyń jartysy 162 adamnyń ǵana qolynda eke­nin rastap otyr. Osy rette halyqtyń jar­ty­synyń aılyq tabysy 50 myń teńgeden aspaıdy. Bul – jylyna 1 300 dollardan sál ǵana asady degen sóz. Mundaı aqshamen ómir súrý múmkin emes. Bulaı jiktelý men teńsizdiktiń qaýipti ekenin aıtqan bolatynmyn. Jaǵdaıdy dereý ózgertý kerek», dedi Qasym-Jomart Toqaev. Osy baǵytta Prezıdent usynǵan naqty da pármendi qadam – «Qazaqstan halqyna» qoǵamdyq-áleýmettik qorynyń qurylǵandyǵy dep oılaımyz. Memleket basshysynyń úndeýine ún qosqan iri kompanııalar men jekelegen kásipkerler atalǵan qorǵa qazirdiń ózinde mıllıardtaǵan teńge qarjy aýdaryp, óz baılyqtaryn halyqpen bólise bastady. Jı­nal­ǵan qarajat memleket pen jeke bıznes usynbaıtyn keıbir qyzmetterge muqtaj adamdarǵa densaýlyq saqtaý, bilim berý, áleýmettik qorǵaý, mádenıet pen sport salasynda qaıyrymdylyq kómek kórsetpekshi.

Jalpy, «Qazaqstan halqyna» qorynyń qurylýy elimizde áleýmettik ádildik ornatýda jurtshylyq kópten kútken ádil sheshim bolǵany sózsiz. Árıne, «baılar da jylaıdy» demekshi, tek solarǵa arqa súıeý keleshekte azdyq etýi múmkin. Sondyqtan bul rette qazirden bastap kóp bolyp oılanarlyq máseleler de bar. Aıtalyq, qoǵamymyzda baılar men kedeılerdiń arasyndaǵy áleý­met­tik alshaqtyqty azaıtý maqsatynda progressıvti tabys salyǵyn engizý qajettigi týra­ly usynys kópten beri aıtylyp júr.

Sońǵy jańalyqtar

Dollar 10 teńgege qymbattady

Qarjy • Búgin, 16:23

Referendýmǵa latvııalyq baqylaýshylar keledi

Referendým-2022 • Búgin, 15:25

Saıajaıdan esirtki zerthanasy tabyldy

Aımaqtar • Búgin, 13:07

Uqsas jańalyqtar