Vaksına saldyrǵan nemese jaqyn arada vırýstan emdelip shyqqan azamattar Odaqtaǵy bir elden ekinshi elge erkin bara alady. Brıýsselde ótken Eýropalyq ister boıynsha mınıstrler kezdesýinde 2022 jyldyń 1 aqpanynan bastap jolaýshylarǵa qatysty karantın men qosymsha testileýdi alyp tastaý sheshimi qabyldandy.
«Biz epıdemııalyq jaǵdaıdy emes, jolaýshylardyń vaksına saldyrǵan-saldyrmaǵanyn eskeremiz, – dedi Fransııa mınıstri Klement Bon. – Biraq vaksına saldyrmaǵan adamdar úshin shekteýler saqtalady».
Birneshe apta boıy Eýropa kartasynyń kóp bóligi óte qaýipti qara-qyzyl túske boıalǵan-dy. Bılik áli kúnge deıin asa qajettilik týyndamasa, saıahattamaýǵa keńes beredi. Biraq sońǵy «omıkron» shtamy aýrýhanaǵa jatqyzý deńgeıin kótermedi. Bul úkimetterge ekonomıkanyń ósýine kedergi keltiretin áleýmettik shekteýlerdi birtindep jeńildetýge múmkindik beredi.
Ár úkimet shekteýlerdi, sonyń ishinde lokdaýndardy, aýrýdyń kúrt órshýi nemese koronavırýstyń jańa shtamy paıda bolǵan jaǵdaıda shekara jabý quqyǵyn ózine qaldyrady. Sonymen qatar Eýropalyq komıssııa vaksınalaý deńgeıi tómen elderdegi sanıtarlyq-epıdemııalyq jaǵdaıdy baqylaýdy kúsheıtedi.
