Qarjy • 27 Qańtar, 2022

Jergilikti bıýdjetterdiń kiristerin ulǵaıtý kerek – senator

44 ret kórsetildi

Senator Sergeı Karplıýk Premer-Mınıstrdiń atyna depýtattyq saýal joldady, dep habarlaıdy Egemen.kz Senattyń baspasóz qyzmetine silteme jasap.

Ol óziniń saýalynda Memleket basshysy bıýdjetaralyq qatynastardy zańnamalyq deńgeıde túbegeıli reformalaýdy tapsyrǵanyn atap ótti. Senatordyń pikirinshe, qarjylyq derbestikti keńeıtý, óńirlik ekonomıkany damytýǵa yntalandyrý jáne jergilikti bıýdjetterdiń kiristerin ulǵaıtý úshin qabyldanyp jatqan sharalar jetkiliksiz bolyp otyr.

«Jalpy sıpatta bólinetin transfertter men nysanaly transfertter turǵyndarǵa memleket kepildik bergen birdeı qyzmetterdi, ásirese ınfraqurylymdyq qyzmetterdi usynýdaǵy óńirler arasyndaǵy alshaqtyqty kóp ózgerte almaıdy. Áleýmettik jaısyzdyq pen shıelenistiń alǵysharttaryna ákeletin sáıkessizdikterdi eskere kelgende, jalpy sıpattaǵy transfertterdi qalyptastyrýdyń tıimdiligi jóninde másele týyndaıdy», dep atap ótti depýtat Sergeı Karplıýk óz saýalynda.

Senator 2020-2022 jyldarǵa arnalǵan jalpy sıpattaǵy transfertterdi qalyptastyrýda jáne Úkimettiń respýblıkalyq bıýdjettiń atqarylýy jónindegi esepterin talqylaý kezinde, sondaı-aq depýtattyq saýaldar men Senatta ótkizilgen is-sharalar barysynda bıýdjet túsimderin boljaý jáne jalpy sıpattaǵy transfertterdi esepteý ádistemelerin jaqsartý qajettigin atap ótti. Sergeı Karplıýk shyǵyndar boljamyn anyqtaý ádisindegi máselelerge de toqtaldy. Onyń aıtýynsha, keıbir baǵyttar boıynsha qarjylandyrýdyń óse túskeni baıqalady, al basqa baǵyttar boıynsha - kerisinshe, qarjylandyrýdyń jetispeýshiligi turaqty sıpatqa aınalyp bara jatyr.

Senator osyǵan baılanysty jergilikti bıýdjet kiristerin boljaý ádistemesin jaqsartý, nysanaly transfertterdi bólý prosesin qaıta qaraý, jalpy sıpattaǵy transfertterdi qaraý jáne qalyptastyrý kezinde jergilikti jáne ortalyq atqarýshy organdardyń jaýapkershiligin belgileý jáne basqa da máselelerdi Úkimet basshysynyń qaraýyna usyndy.

Sońǵy jańalyqtar

Uqsas jańalyqtar