Cerebra – ıshemııalyq jáne gemorragııalyq ınsýlttiń avtomattandyrylǵan dıagnostıkasyna arnalǵan neıroradıologııa salasyndaǵy jasandy ıntellekt. Joba Qazaqstannyń 17 ınsýlt ortalyǵynda sátti jumys istep jatyr. Kompanııa bul baǵdarlamany eldegi barlyq ınsýlt ortalyqtaryna ornatýdy josparlap otyr. Ony ázirlegen Almaty A.I. Lab kompanııasy 2018 jyldan beri jasandy ıntellekt salasyndaǵy tehnologııalardy ázirleýmen aınalysady.
«Álemde ınsýlt dıagnostıkasymen aınalysatyn birneshe iri kompanııa bar. Izraıl, Ulybrıtanııa jáne AQSh básekelesteriniń qarjy, personal sany, jasandy ıntellektini oqytýǵa medısınalyq derekter kólemi boıynsha aıqyn artyqshylyqtaryna qaramastan, bizdiń komandamyzdyń adamzatqa paıdasyn tıgizýge motıvasııasy mol. Damyǵan elderde ınsýlttan bolatyn ólim-jitim kórsetkishi azaıtyldy, al elimizde ınsýlt ólimniń birinshi sebepteriniń biri bolyp qalýda. Jobany shetelge taratý úshin biz Qazaqstanda jaqsy nátıje kórsetýimiz kerek. Bul rette biz memlekettik qoldaýǵa muqtajbyz», deıdi joba negizin qalaýshysy Dosjan Júsipov.
Astana Hub baspasóz qyzmetiniń PR jáne marketıng bóliminiń aǵa menedjeri Altyngúl Jańabaıdyń aıtýynsha, Cerebra – Astana Hub jáne AHQO rezıdenti. MedTech startaby bastapqy kezeńde Sıngapýrdaǵy Quest Ventures venchýrlyq qorynan qarjylandyrýdy tartty. Sonymen qatar joba «Sábı» qorynyń «О́z bıznesińdi qur 2019-2020» baıqaýynda 1-orynǵa ıe boldy. Cerebra qazaqstandyq jáne sheteldik startaptar arasynda joǵary orynǵa ıe. Iаǵnı Astana Hub nusqasy boıynsha 2020 jyldyń úzdik startaptar ondyǵyna, Irbis Ventures nusqasy boıynsha Ortalyq Azııadaǵy eń keleshekti startaptar ondyǵyna kirdi, al 2021 jyldyń mamyrynda joba Shyǵys Eýropa, Ortalyq Azııa jáne Reseıdegi 700 startaptardyń ishinde EMERGE Challenge 2021 fınalısterdiń bestigine endi.
