Qazaqstan • 01 Aqpan, 2022

Adasqandar arandady

908 ret kórsetildi

Al olardy adastyrǵandar aıyldaryn jıdy ma?

Bıylǵy qańtardaǵy qasirettiń zardaptary jurtqa málim bolǵanymen, onyń túpki sebepteri týrasynda qoǵamda árqıly pikir aıtylyp jatyr. Bul jaıly Memleket basshysy Qasym-Jomart Toqaev Parlament Májilisinde sóılegen sózinde: «О́kinishke qaraı, búginde halyq arasynda osy oqıǵaǵa baılanysty túr­li qarama-qaıshy, shyndyqqa janas­paıtyn jalǵan aqparattar tarap ket­kenin kórip otyrmyz. Munyń, árıne, bir­neshe sebepteri bar: keıbir azamattarymyz ahýaldy egjeı-tegjeıli bilmeı turyp, qate pikirde bolsa, keıbiri ádeıi aqparatty burmalap, jaǵdaıdy odan beter ýshyqtyrady», degen bolatyn.

El Prezıdentiniń aıtýynsha, qańtar­daǵy qasiret – birneshe jyl boıy aldyn ala oılastyrylǵan zulymdyqtyń kórinisi. «Munyń qatarynda Jambyl oblysynda bolǵan tártipsizdikter, etnosaralyq sıpattaǵy arandatýshylyqtar men basqa da shıelenister bar. Qoǵamymyzdyń tutastyǵyn júıeli túrde, sonyń ishinde narazylyqtar men kásibı túrde ázirlengen ssenarıılerdi qoldaný arqyly shaıqaltyp kelgen. Radıkaldy sharalardyń naqty oryndaýshylaryn daıyndaý jasyryn túrde júrgizilgen. Ulttyq qaýipsizdik komıteti ýákiletti organ retinde osy búldirgi jumystarǵa naqty baǵa bere almady jáne bergisi de kelmedi. Ulttyq qaýipsizdikke tóngen asa úlken qaýipti kórmedi», dedi Qasym-Jomart Toqaev.

Memleket basshysy qańtardaǵy qasiret­tiń qaıtalanýyna jol bermeý maqsa­tynda aldaǵy ýaqytta atqarylatyn mańyzdy jumys baǵyttarynyń biri – dinı ekstremızmge qarsy kúreste júıeli is-sharalar keshenin iske asyrý ekenin atap kórsetti. О́ıtkeni Almaty qalasy men keıbir óńir­lerde qoldaryna qarý alyp, bılik organdaryn shabýyldaǵandar, beıbit turǵyndardy qorqytyp, «tiri qalqan» etip ustaǵandardyń ishinde destrýktıvti dinı aǵymnyń ókilderi bar ekeni áshkerelenip otyr.

Budan birneshe jyl buryn Aqtóbe, Taraz, Almaty qalalarynda bolǵan qandy terrorıstik qylmystar da osyndaı jat aǵymǵa ergen jastardyń qoldarymen jasal­ǵany belgili. О́kinishke qaraı, Mem­leket basshysy aıtqandaı, elimizdiń ulttyq qaýipsizdik organdary tarapynan sol qylmystardyń shyǵý sebepteri jan-jaqty zerttelip, olardy aldaǵy ýaqyt­ta boldyrmaýdyń pármendi sharalary qabyldanbaǵany anyq. Qańtardaǵy qasiret – sonyń aıǵaǵy.

Shyndyǵynda, múddeli memlekettik organdar myqtap qolǵa alsa, din salasyndaǵy kókeıkesti máselelerdi ońynan sheshýge bolatynyn ómir tájirıbesi kórsetken. Máselen, osydan on bes jyldaı buryn elimizge syrttan kirgizilgen bir destrýktıvti dinı aǵymdy ýaǵyzdaýshylar toby anyq­talyp, olar qoldanystaǵy zańnamaǵa sáıkes jaýapqa tartyldy, qaısybiri tipti elden alastatylǵan. Sodan keıin ol aǵym­nyń órisi tarylyp, búginde umytylýǵa aınal­ǵandaı. Sol kezde halqymyzdy ıslam di­ni­niń ata-babamyz ustanǵan, ejelgi salt-dástúrlerimizben úılesken Hanafı mazhaby aıasyna toptastyrý haqynda keńinen úgit-nasıhat júrgizilgendigin aıtqan jón. Alaıda keıingi jyldary osy baǵyttaǵy túsindirý jumystary áldebir sebeptermen álsirep ketken tárizdi.

Qazir áleýmettik jelilerde: «Saqaldy sodyrlar anaý dinı aǵymnyń ókilderi eken. Sondyqtan ondaı dinı aǵymǵa zań boıynsha tyıym salý kerek» degen maǵynadaǵy pikirler aıtylyp júr. Al keıbir buqaralyq aqparat quraldary qańtardaǵy qantógis kezinde qolǵa túsken buzaqylardyń ishinde Qazaqstanda ekstremıstik uıymdar qataryna jatqyzylǵan «Tablıǵı Jamaǵattyń» bir qanaty – «Iakyn Inkar» radıkaldy uıy­mynyń jaqtastary bolǵandyǵyn habarlady.

Árıne, beıbit sherýlerdiń búldirgishtik sıpat alyp ketýine kináli sodyrlardyń naqty qandaı dinı aǵymnyń ókilderi ekenin jete anyqtap baryp qana ádil sheshim qa­byl­daý kerek. Biraq bir nárseniń basy ashyq – sholaq balaqty, shoqsha saqaldy jastar da – óz baýyrlarymyz. Kóbi – eki búıirden qysqan joqshylyqtyń saldarynan azǵyndaýǵa erip, adasqan jandar sııaqty. Endi olardy keýdelerinen keri ıtermeı, túzý jolǵa túsirýdiń amalyn izdegenimiz abzal. Sonymen qatar jastarymyzdy jat aǵymǵa kirgizip, arandatqandardyń kimder ekenin de áshkerelep, aıyldaryn jıǵyzý qajettigi de daýsyz. Dinimizdiń tutastyǵyna, ultymyzdyń birligine tóngen eleýli qaýipti eskermeske bolmaıdy.

Sońǵy jańalyqtar

Jetisý oblysynyń TJD basshysy taǵaıyndaldy

Taǵaıyndaý • Búgin, 15:08

Aralda jol apatynan bir adam kóz jumdy

Oqıǵa • Búgin, 11:35

Qazaqstannyń eksport kólemi artty

Ekonomıka • Búgin, 09:52

Pleı-offtan tys qaldy

Fýtbol • Búgin, 08:43

Úshinshi orynǵa kóterildi

Sport • Búgin, 08:40

Úzdik tórttiktiń qatarynda

Tennıs • Búgin, 08:39

Kásipkerlerge push-habarlama jiberedi

Tehnologııa • Búgin, 08:37

Uqsas jańalyqtar