Obal

– Qyrymen ur! – dep aıǵaı saldy kórshisi balasyna zekip.

Álde kúndelikti sútin saýyp, qaımaǵyn jep otyrǵan malǵa jany ashymaǵan balany keketkeni, bálkim qyrqyndy shópti jumyryna juq qylamyn dep bas bermeı turǵan sıyrǵa ashýlandy ma eken.

Kóldeneń kóriniske kóńil aý­darǵan soń naǵashym­nyń kórshisiniń jasy úlken bolsa da jónin aıtýǵa bekindik. Áýe­l­i balalarǵa. Jazyqsyz maldy jábir­leýdiń jón emestigin. Atam qazaqta obal degen uǵym­nyń bar ekendigin tilimiz jet­kenshe sıpattadyq. Tórt tú­lik malǵa qatysty yrym-jyrym qazaqta jetip artylady. Burynǵy mal baqqan qazaq sonyń barlyǵyn qatań saqtaǵan. Qazirgi kúni qorama mal bitpeıdi deıtin keıbireýler sol yrymdy saqtamǵan soń zardabyn tartyp ta júrgen shyǵar. Al onsyz da aıaǵyn áreń basyp júrgen aryq, kóterem sıyrdy sabaý adamshylyqqa jatpasa kerek.

Eki bala teris aınaldy. Bá­ri­niń bas terisi kelispeı tur­ǵan soń naǵashymyzdyń úıine burylǵanbyz. Sharýa yńǵaı­lanǵan soń qaıtpaq boldyq. Bizdiń aýyl buryn keńshardyń ortalyǵy edi. Áne, ana kóshede  eki qabatty mádenıet úıi bolatyn. Qazir jym-jylas. Áldebireý bolar-bolmas tıynǵa satyp alyp, tik kótere buzyp áketipti. Mádenıet úıiniń arǵy jaǵy jaz boıy jaıqalyp turatyn baq edi. Alma aǵashy gúldegende tóńirektiń bári ıran baǵy tárizdi bolyp turýshy edi ǵoı. Keıin ol baqtyń da baǵy taıdy. Kóp biletin bireý etti alma aǵashynyń butaǵymen súrleseń, dámi til úıirip turady deıtin pikir aıtqan ǵoı. Tátti etti jaqsy kóretin bizdiń aǵaıyn dál aýyldyń irgesinde jaınap turǵan baqty túgel otaǵan. Sóıtip, bir kún súr et jeımin dep atalarymyzdyń mańdaı terimen ósken qanshama jemis aǵashtaryn shaýyp tastady.

Sol kezde obal dep eshkim aıt­pady ma eken? Altaı­dan Aty­raýǵa deıingi ıen dalany jaılap, attyń jalynda, túıeniń qomynda kún keshken ata-babalarymyz ár nárseniń obalyn oılaıtuǵyn.  Keshegi qazaqtyń kóshi taǵdyrdyń soqtyqpaly-soqpaly jolynan súrinbeı ótse, sol dástúrdi saqtaǵanynan edi ǵoı.

Kókshetaý