«Barlyq maınıng fermalardy anyqtaý, salyq jáne keden máselelerin tekserý qajet. Alynǵan tehnıkalyq sharttardy, sondaı-aq olardyń qyzmetiniń basqa da qyrlaryn muqııat zerdeleý kerek. 15 naýryzǵa deıin esep berýlerińizdi suraımyn», dedi Prezıdent.
Onyń aıtýyna qaraǵanda, memleket jumysyn búkpesiz ashyq júrgizetin maınıngke qarsy emes.
«Bul salada jumys istegisi keletinderdiń lısenzııasy bolýy qajet. Elektr energııasyn aqylǵa qonymdy tarıf boıynsha alyp, kirisin deklarasııalaýy jáne salyq tóleýi, «jasyl» energetıka jobalaryn iske qosýy tıis. Maınıng salyqtaryn biz de arttyramyz. Qazirgi qýattyń ár kılovatyna 1 teńge degen mólsherleme óte mardymsyz. Úkimetke atalǵan salyqty eselep, ári qysqa merzimde arttyrýdy tapsyramyn», dedi Memleket basshysy Úkimettiń keńeıtilgen otyrysynda.
Sondaı-aq, Memleket basshysy Sıfrlyq maınıngti retteý men damytý jónindegi sheshimderdiń tolyqqandy paketin ázirleýdi tapsyrdy.
«Úkimet sıfrlyq maınıngti retteý men damytý boıynsha tolyqqandy sheshimder paketin ázirleýi kerek. Nátıjeni 1 sáýirge deıin kútemin», dep tapsyrdy Qasym-Jomart Toqaev.
