Senator Teńiz jáne Qashaǵan ken oryndaryn ıgerýdi belsendi túrde ulǵaıtý, sondaı-aq Atyraý munaı-hımııa parkin damytý jáne gaz óńdeý zaýytyn salý taıaý bolashaqta sý tapshylyǵynyń artýyna alyp keledi dep sanaıdy. Ol ásirese Atyraý oblysynyń Isataı, Jyloı aýdandary men Qulsary qalasynyń turǵyndaryna qatysty bolýy yqtımal, mundaǵy turǵyndar qazirgi kezdiń ózinde jaz mezgilinde sýdy saǵat boıynsha alady.
Bul máseleni sheshýge «Kókjıde» tushy sý erekshe ken orny kómektese alar edi. Ol Aqtóbe jáne Atyraý oblystarynyń shekarasynda Muǵaljar aýdanynda ornalasqan batys óńirdegi eń iri tushy sý kózi. Alaıda, senator jer qoınaýyn paıdalanýshylar osy ken orny aýmaǵy men dál janynan uńǵyma qazyp, izdestirý jumystaryn júrgizip jer asty sýynyń lastanýyna ákelýi múmkin dep alańdap otyr. Al taza sý kózi lastanǵan jaǵdaıda týyndaıtyn shyǵyn jer qoınaýyn paıdalanýshylardan túsetin kiristermen salystyrýǵa kelmeıdi.
«Osy gıdrogeologııalyq obektidegi jerasty sýynyń jaı-kúıine turaqty monıtorıng júrgizý úshin biryńǵaı operatordy aıqyndaý máselesin qaraýdy suraımyz. Kókjıde mekeninde ekologııalyq jaǵdaıdyń nasharlaýyna jáne jer asty sýynyń lastanýyna jol bermeý úshin qoldanystaǵy munaı óndirýge arnalǵan kelisimsharttardy zerdeleý kerek. Qajet bolǵan jaǵdaıda, munaı kompanııalaryna odan ári izdestirý jumystaryn júrgizýge tyıym salý jáne kelisimsharttardy uzartpaý kerek. Aqtóbe oblysynyń aýmaǵynda ornalasqan Kókjıde jer asty tushy sý ken ornynan Atyraý oblysynyń aýdandaryna sý tartýǵa baılanysty jobany iske asyrý jóninde sharalar qabyldansyn», dep atap ótti senator.
