Qasym-Jomart Toqaev azamattardyń narazylyǵyn lańkester men qylmyskerler paıdalanyp ketkenin aıtyp ótti.
– Buǵan bárimiz kýá boldyq. Rasynda, áleýmettik jelide Tuńǵysh Prezıdentimiz týraly ártúrli oılar aıtylyp, jazylyp jatyr. Qansha adam bolsa, sonsha pikir bolady, – dedi ol jýrnalıstiń Tuńǵysh Prezıdent pen onyń otbasyna qatysty suraǵyna.
Sondaı-aq Qasym-Jomart Toqaev Nursultan Ábishuly Nazarbaevtyń 30 jyldyq eńbegin joqqa shyǵarýǵa bolmaıtynyn jetkizdi.
– Tarıhqa qııanat jasamaý kerek. Nursultan Nazarbaev – memleketimizdiń irgesin qalaǵan, memlekettigimizdi nyǵaıtýǵa zor úles qosqan tulǵa. Onyń qyzmetine ádil baǵa berýge mindettimiz. Tuńǵysh Prezıdenttiń kemshilikteri bolsa, odan jas basshylar sabaq alýy qajet. Qańtar oqıǵasy elimizge de, meniń ózime de úlken sabaq bolǵany sózsiz. Tıisti qorytyndy jasaldy. Qazir elimizde bolyp jatqan saıası sheshimder − sonyń nátıjesi. Aldymyzda óte kóp jumys bar. Muny barlyǵy kórip, bilip otyr dep oılaımyn, – dedi Prezıdent.
Memleket basshysy halyq narazylyǵynyń astarynda ótkir áleýmettik másele baryn da tilge tıek etti.
– Halyqtyń kóbiniń áleýmettik jaǵdaıy tómen. Bul – aqıqat. Memlekettiń tutas baılyǵy az ǵana toptyń qolynda. Teńsizdik beleń alýda. Narazylyqtyń túp-tamyry osydan bastaldy. Bul másele týraly men Parlamentte, basqa da jıyndarda aıttym, – dedi ol.
