Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen «Eýrazııalyq áıelder alıansy» QB is-sharanyń uıymdastyrýshysy boldy. I jáne II halyqaralyq forýmdar EXPO 2015 Milan jáne EXPO 2017 Astana kórmeleri aıasynda ótkizildi.
2030 jylǵa deıingi kezeńge arnalǵan turaqty damý salasyndaǵy jahandyq kún tártibinde áıelderdiń jan-jaqty jáne tıimdi qatysýyn qamtamasyz etý qajettiligi jáne sheshimder qabyldaýdyń barlyq deńgeılerinde, onyń ishinde qoǵamdyq ómirde basshylyq jasaý úshin olardyń teń múmkindikteri erekshe atap ótildi.
Forýmnyń negizgi ıdeıasy ekonomıka men mádenıettiń túrli salalaryndaǵy halyqaralyq gýmanıtarlyq yntymaqtastyqty damytý úshin qoǵamdyq bastamalar men ártúrli elder áıelderiniń umtylystaryn biriktirý bolyp otyr.
Forýmnyń plenarlyq otyrysynda Eýrazııalyq áıelder alıansy Basqarma tóraǵasy, Máskeý qalasyndaǵy Eýrazııa áıelder forýmy tóraǵasynyń orynbasary Raıhan Bákirova, Qazaqstan Respýblıkasynyń Birikken Arab Ámirlikterindegi bas konsýly Raýan Jumabek, Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Lázzat Ramazanova, Italııa Ulttyq pavılonynyń dırektory Izabella Kolandjelo jáne basqalar sóz sóıledi.
Forýmda «Áleýmettik ózgerister men ómir sapasyn arttyrý maqsatynda áıelder kóshbasshylyǵyn nasıhattaý» jáne «Qazirgi zamannyń jahandyq syn-tegeýrinderi jaǵdaıynda etnomádenı qundylyqtardy saqtaý: sıfrlandyrý jáne vırtýaldy ǵalam» atty eki taqyryptyq sessııa ótti. Sessııa sheńberinde áıeldiń ǵylymdaǵy, áleýmettik ózgeristerdegi, medısınadaǵy jáne jasyl tehnologııalardaǵy róli talqylandy.
Forým sońynda pavılon aldyndaǵy aýmaqta «Saryarqa – Uly Dala áıelderi» portretin salǵan sýretshi-passıonarıı, Qazaqstan Sýretshiler odaǵynyń múshesi, halyqaralyq baıqaýlardyń laýreaty jáne KINES pen Gınnestiń rekordshysy Renat Elýbaevtyń qatysýymen shoý ótti.
