Qazaqstan • 20 Aqpan, 2022

EXPO 2020 Dubai kórmesinde qazaqstandyq pavılon mıllıonynshy kelýshisin qarsy aldy

Búgin Dúnıejúzilik EXPO 2020 Dubai kórmesindegi Qazaqstan Respýblıkasynyń Ulttyq pavılony mıllıonynshy kelýshisin qarsy aldy. Ol Dýbaı qalasynyń 38 jasar turǵyny, kásipker Mahmýd Ál Býraı atandy, dep habarlaıdy Egemen.kz.

Dana MYRZAQADIR

Onyń aıtýynsha, ol Qazaqstanda buryn-sońdy bolmaǵan, sondyqtan bizdiń elge kelý múmkindigin jiberip almaýǵa tyrysatynyn aıtty.

«Dostarym maǵan Qazaqstan pavılonyna barýǵa keńes berdi. Olar onyń EXPO-daǵy eń úzdik pavılondardyń biri ekenin aıtty. Men Qazaqstanda eshqashan bolǵan emespin, sodan bolar pavılonnyń mazmunynan úlken áser aldym. Maǵan ásirese robot qolmen usynylǵan qoıylym unady, ol óte emosıonaldy jáne keremet, al pavılon aldynda óner kórsetken ulttyq orkestr tamasha týyndylardy oryndaýymen tánti etti. Men elderińizge baryp, saıahat jasaıtynyma óte qýanyshtymyn», dedi Ál Býraı.

Qazaqstandyq pavılon men Qazaqstan Respýblıkasy, sondaı-aq EXPO 2020 Dubai uıymdastyrýshy komıteti atynan mıllıonynshy qonaqty Qazaqstan Respýblıkasy Premer-Mınıstriniń orynbasary - Saýda jáne ıntegrasııa mınıstri Baqyt Sultanov, Qazaqstan Respýblıkasynyń BAÁ-degi Tótenshe jáne О́kiletti elshisi Madııar Meńilbekov, EXPO 2020 Dubai kórmesi tóraǵasynyń halyqaralyq qatysýshylar jónindegi orynbasary Omar Shehade, EXPO 2020 Dubai-daǵy Qazaqstan Respýblıkasynyń Ulttyq seksııasynyń bas komıssary Allen Sháıjúnisov quttyqtady.

Mahmýd Ál Býraıǵa Qazaqstanǵa tegin týrǵa eki adamǵa arnalǵan sertıfıkat berildi. Áýe bıletteri men Qazaqstanǵa barý týryn qazaqstandyq Air Astana áýe kompanııasy men «Kazakh Tourism» Ulttyq kompanııasy usyndy.

Esterińizge sala keteıik, Dúnıejúzilik EXPO 2020 kórmesi Dýbaıda 2021 jyldyń 1 qazany men 2022 jyldyń 31 naýryzy aralyǵynda ótedi jáne Taıaý Shyǵystaǵy alǵashqy EXPO kórmesi. Kórmeniń taqyryby – «Aqyl-oıdy biriktirip, bolashaqty qurý». EXPO 2020 Dubai uıymdastyrý komıtetiniń málimeti boıynsha, 15 aqpandaǵy esep boıynsha kórmeni 13,5 mln adam tamashalaǵan, al Ulttyq pavılonǵa kúnine orta eseppen 8 myń adam keledi.

Qazaqstan pavılonynyń týrıster úshin tartymdylyǵyna sýret salǵan adamdar sany boıynsha Gınnestiń rekordtar kitabyna engen «Álem beınesi» art-jobasy múmkindik beredi.

Týrıstik qyzyǵýshylyqtan bólek, ol halyqaralyq bıznes toptary arasynda joǵary qyzyǵýshylyqqa ıe. QR Ulttyq pavılonynyń alańynda 30-ǵa jýyq iskerlik is-shara josparlanǵan, onyń aıasynda konferensııalar, forýmdar, B2B kezdesýler ótedi, sondaı-aq eldiń ınvestısııalyq jáne týrıstik áleýeti boıynsha jobalar, ǵylym jáne bilim berý salasyndaǵy bastamalary usynylady.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz