«El chempıonaty 2022 jyldyń jeltoqsan aıynda ótedi. Qatysýshylarǵa sharanyń ótetin orny men naqty kúni keıinirek aıtylady», dep habarlady federasııadan.
Uıym málimetinshe, federasııanyń vıse-prezıdenti Oksana Ten 21-23 aqpan aralyǵynda Almatyda mánerlep syrǵanaýdan Qazaqstan chempıonaty ótetini týraly óńirlerge jiberiletin jedelhatqa qol qoıǵan. Bul qujat búgingi kúni jaramsyz dep tanyldy.
«Federasııa vıse-prezıdentteriniń mórge qol qoıýǵa jáne paıdalanýǵa, sondaı-aq jeke sheshim qabyldaýǵa quqyǵy joq. Respýblıkalyq jarystardy ótkizý týraly ereje sportshylardyń múddeleri men jattyqtyrýshylar quramynyń pikirin eskere otyryp, alqa jıynynda qaralady. Federasııamen kelisilip, Mádenıet jáne sport mınıstrligine bekitýge jiberiledi», dep atap ótti Ulttyq konkıshiler federasııasy.
Eske salaıyq, 11 aqpanda uıymnyń quryltaı jınalysynyń qorytyndysy boıynsha vıse-prezıdentter laýazymy joıyldy.
«Federasııa reformalar men ózgeristerdiń ýaqyty kelgenine senimdi. Mánerlep syrǵanaý ár adam úshin naqty jaýapkershilik aımaqtary bar naqty sheshim qabyldaý júıesin qajet etedi. Komandada jumys isteı alatyn, sportshylardyń daıyndyǵy men ósýin naqty qalyptastyratyn, qarjylandyrýdyń ashyq júıesi men ádil tórelik etetin tıimdi menedjerlerdiń ýaqyty keldi. Sonymen qatar, federasııa O.A.Ten atqarǵan jumysy men mánerlep syrǵanaý sportynyń damýyna qosqan úlesi úshin alǵys aıtady», delingen UKF habarlamasynda.
