Ernar Jańadil «Samuryq-Qazyna» AQ damý jáne jekeshelendirý jónindegi basqarýshy dırektory qyzmetine taǵaıyndaldy. Birinshi kezekte ol «QazMunaıGaz «UK» AQ jáne «Eır Astana» AQ kompanııalarynyń qoryna tıesili jekeshelendirý baǵdarlamasyna jaýap beretin bolady. Jaqyn arada bul aktıvterdi IPO-ǵa shyǵarý josparlanyp otyr, oǵan Qazaqstannyń barlyq turǵyndary qol jetkize alady.
«Ernar Jańadildiń aldyna elge sheteldik ınvestısııalardy tartýdy jalǵastyrý mindeti qoıyldy. Ernar Beısenuly osy ýaqytqa deıin Investısııalar, jekeshelendirý jáne halyqaralyq yntymaqtastyq jónindegi Basqarýshy dırektor qyzmetin atqardy. 2018 jyly «Qazatomónerkásip «UAK» AQ-nyń IPO-ǵa, sodan keıin SPO-ǵa tabysty shyǵýyna belsene qatysty. 2021 jyly ol Qordyń birqatar beıindi emes aktıvterden tıimdi shyǵýyn qamtamasyz etti. «Samuryq-Qazyna» AQ-na qyzmetke turǵanǵa deıin Ernar Jańádil Pricewaterhouse Coopers LLP AQ-da jumys istedi. Býhgalterlik esep jáne qarjy salasynda magıstr dárejesi bar (Manchester ýnıversıteti, Ulybrıtanııa). Prezıdenttik Jastar kadrlyq rezerviniń múshesi», delingen habarlamada.
Qordyń strategııa jáne aktıvterdi basqarý jónindegi basqarýshy dırektory laýazymyna Ernat Berdiǵulov taǵaıyndaldy. Onyń aldyna qoıylǵan negizgi mindet - bul qordyń uzaq merzimdi damý strategııasyn ázirleý jáne iske asyrý, aktıvterdi tıimdi basqarý jáne ınfraqurylymdyq jobalardy ýaqtyly iske asyrý. Ornyqty damýdy qamtamasyz etý, portfeldik kompanııalar qyzmetine korporatıvtik basqarýdyń ERP-qaǵıdattary men ozyq tásilderin engizý ınvestısııalyq tartymdylyqty arttyrýǵa jáne uzaq merzimdi qunnyń ósýin qamtamasyz etýge múmkindik beredi.
«Ernat Qudaıbergenuly Qorda strategııa, turaqty damý jáne sıfrlyq transformasııa jónindegi Basqarýshy dırektor laýazymyn atqarǵan bolatyn. Ernat Berdiǵulovtyń halyqaralyq konsaltıngtik kompanııalarda on jyldan astam jumys tájirıbesi bar. Iskerlik ákimshilik salasynyń magıstri (MBA, University of Warwick, Ulybrıtanııa), «Bolashaq» baǵdarlamasy boıynsha bakalavr bitirgen (University of Toronto, Kanada). Prezıdenttik Jastar kadrlyq rezerviniń múshesi», dedi «Samuryq-Qazyna» AQ baspasóz qyzmeti ókilderi.
«Samuryq-Qazyna» AQ Qoǵammen baılanys jáne ózgeristerdi basqarý jónindegi Basqarýshy dırektor laýazymyna Ǵıbrat Aýǵanov taǵaıyndaldy. Ǵıbrat Qaıratulynyń jaýapkershiligine úsh departament kiredi: Áleýmettik-eńbek qatynastary jáne adam resýrstaryn basqarý departamenti, ózgeristerdi basqarý departamenti jáne jurtshylyqpen baılanys departamenti.
«Alǵa qoıylǵan mindetterge sáıkes jańa ashyq kadr saıasatyn engizý, ınklıýzıvtilik pen ashyqtyq deńgeıin arttyrý mindeti tur. Budan basqa, sıfrlandyrý sheńberinde IT-tehnologııalar men aýqymdy derekterdi taldaý bazasynda óndiristik jáne basqarý prosesterin qaıta qurý qajet bolady. Sondaı-aq, Qordyń jurtshylyqpen qarym-qatynastaryn qaıta júkteý sheńberinde kompanııanyń qyzmeti týraly ashyqtyqty jáne BAQ-tyń kásibı qoǵamdastyǵyn habardar etýdi qamtamasyz etý qajet. Osy jáne basqa da birqatar ózgerister kompanııa qyzmetiniń qoǵam úshin ashyqtyǵy men aıqyndyǵyn qamtamasyz etýge, adamı faktordy, ásirese sybaılas jemqorlyq qaýipti sektorlardy barynsha joıýǵa baǵyttalǵan», dep atap ótti qorda.
Buǵan deıin Aýǵanov «Samuryq-Qazyna» AQ adam resýrstaryn basqarý departamentiniń dırektory qyzmetin atqarǵan. Prezıdenttik Jastar kadrlyq rezerviniń múshesi.
Nıkolaı Kazýtın Qordyń quqyqtyq qoldaý, qamtamasyz etý jáne táýekelder jónindegi basqarýshy dırektory bolyp taǵaıyndaldy. Quqyqtyq salanyń aǵymdaǵy máselelerinen basqa, ol otandyq taýar óndirýshiler men shaǵyn jáne orta bıznesti qoldaý úshin Qordyń satyp alý prosesinde ashyqtyqty qamtamasyz etý maqsatynda satyp alý boıynsha qoldanystaǵy korporatıvtik qujattardy ózgertýge, sondaı-aq qorda júrgizilip jatqan reformalardy quqyqtyq qamtamasyz etýge jáne halyqaralyq tórelikterde Qordyń múddelerin tıimdi qorǵaýǵa jaýap beredi.
«Samuryq-Qazyna» AQ Investısııalar jónindegi departamentiniń dırektory laýazymyna buryn Qordyń Investısııalar jónindegi departamentiniń jobalardy qurylymdaý sektorynyń basshysy qyzmetin atqarǵan Sábıǵat Rahmetov taǵaıyndaldy. Qoǵammen baılanys departamentiniń dırektory laýazymyna Damır Egizbaev taǵaıyndaldy. Buǵan deıin ol Aýyl sharýashylyǵy mınıstrliginiń baspasóz hatshysy, sondaı-aq UEM «Qazaqstandyq MJÁ ortalyǵy» AQ kommýnıkasııalar jónindegi dırektory laýazymyn atqarǵan bolatyn.
