Sýretti túsirgen Nurbolat Nurjaýbaı
Jýyrda Jańaqorǵan aýdanynda saıatshylyqtan respýblıkalyq chempıonat ótti. Eresekter arasyndaǵy XV chempıonatqa elimizdiń 2 qalasy men 10 oblysynan saıatshylar qatysty. Ulttyq sporttyń osy túrinen Qyzylorda oblysynda alǵash uıymdastyrylyp otyrǵan saıys qonaqtary jetisýlyq ardager saıatshylar Ábdikárim Túseı men Shaımardan Áden, aǵa jattyqtyrýshy Bazarbek Kúntýǵanuly, «Qyran» federasııasynyń prezıdenti, Qazaqstannyń qurmetti sport qaıratkeri Baǵdathan Múptekeqyzy jarysqa qatysýshylarǵa sáttilik tiledi.
Qazir Qazaqstandaǵy ulttyq sport mektepteriniń janynan qusbegilikke baýlý sabaqtary uıymdastyrylǵan. Osynyń arqasynda atadan qalǵan ónerge qyzyǵýshy jastar qatary kóbeıip otyr.
– Ásirese Almaty, Jambyl, Túrkistan oblystarynda mektep janyndaǵy qusbegilik bólimderi jastarmen jumysty jolǵa qoıǵan. Maqsatymyz – osyndaı sharalardy jıi uıymdastyryp, saıatshylyqty at báıgesi, jamby atý, kókpar sııaqty damyp ketken ulttyq sport túrine teńestirý, – dedi Baǵdathan Múptekeqyzy.
Qarataý baýraıynda qyran qalyqtatqan saıysta Túrkistan oblysynan kelgen Seıdýlla Pańnyń qarshyǵasy alǵyrlyq kórsetip, bas júldeni ıelense, mańǵystaýlyq Aıshýaq Taımanovtyń ıtelgisine birinshi oryn berildi.
Búrkitshiler saıysynda Atyraý oblysynan kelgen qusbegi Aqberen Qurmanalıevtiń qyrany bas júldeni jeńip aldy. Oblys ákimdigi, dene shynyqtyrý jáne sport basqarmasy, Jańaqorǵan aýdany ákimdiginiń uıymdastyrýymen ótken chempıonatta ekinshi, úshinshi oryn ıelengen qusbegiler de marapat tórinen kórindi.
Qyzylorda
