Jyl basynda Qazaqstan halqy qoǵamdaǵy turaqtylyqtyń, birliktiń, azamattyq kelisim men beıbitshiliktiń baǵa jetpes qundylyqtaryn eske túsirgen qaıǵyly oqıǵalardy bastan keshirdi. Biz árqaısysymyz terrorlyq árekettiń, saıası jáne qoǵamdyq haostyń, ohlokratııanyń jáne eń bastysy – elimizdiń qaýipsizdigine, turaqtylyǵyna, egemendigi men táýelsizdigine tóngen qaýip-qaterdiń shegine jetkenin sezindik.
Halqymyzdyń, azamattarymyzdyń – óz Otanynyń naǵyz patrıottarynyń basym kópshiliginiń erik-jigeriniń, danalyǵy men azamattyq jaýapkershiliginiń arqasynda ǵana biz tarıhymyzdyń qıyn-qystaý sátin birge eńserdik.
Biz «Qasiretti qańtar» sabaqtarymen birge el men onyń halqy ómiriniń barlyq salalarynda tereń ekonomıkalyq, áleýmettik jáne saıası ózgeristerdiń pisip-jetilý qajettiligin uǵyndyq.
Búginde atalǵan baǵyttar boıynsha barlyq memlekettik apparatta – Úkimette, Parlamentte, el óńirlerinde qarqyndy jumystar atqarylýda. Bul jasampazdyq qyzmetke azamattyq qoǵam ınstıtýttary – saıası partııalar, qoǵamdyq uıymdar, Qazaqstan halqy Assambleıasy, buqaralyq aqparat quraldary, azamattyq belsendiler de qosyldy. Belsendi saraptamalyq talqylaýlar ótip jatyr, buqaralyq aqparat quraldary búkil qoǵam, Qazaqstannyń árbir azamaty kútetin ózgeristerdi qalt jibermeýge tyrysýda. Osy turǵydan alǵanda, Jańa Qazaqstandy qurý baǵytyn búkil halyq bolyp qoldaý – bul jańa kókjıekterge jol ashatyn barsha halyqtyń tereń áleýmettik suranysy.
Árbir jaýapty azamat búginde jańa tásilder men qabyldanyp jatqan sharalardyń durystyǵyna nyq senimdi, óıtkeni olar bizdiń halqymyzdyń irgeli umtylystary men qajettilikterine – óziniń bolashaǵyna degen senimdiligine, áleýmettik qorǵalýyna, turǵyn úıge, bilimge, medısınaǵa, jumysqa qoljetimdilikpen qamtamasyz etilýine negizdelgen.
Búginde bárimiz birge osy baǵytta halyqqa, azamattarymyzdyń árqaısysyna qajetti alǵashqy qadamdardy jasap jatyrmyz. Sybaılas jemqorlyqqa, paraqorlyqqa, qoǵamdyq ıgilikterdiń ádiletsiz bólinýine senimdi tosqaýyl qoıatyn, básekelestik pen tıimdi bıznes úshin keńistik ashatyn basqa da jańa júıeli sharalar, sonyń ishinde saıası sharalar bolatynyna senimdimiz.
Biraq bul úshin zańdar, erejeler men ınstıtýttar ǵana qajet emes, sonymen qatar bizdiń qoǵamdyq sanamyzdy ózgertýdiń, halqymyzǵa tán ózin ózi baǵalaýdyń, eńbektiń, qarapaıymdylyqtyń jáne zańǵa baǵynýdyń dástúrli qundylyqtaryn sińirýimiz qajet, Uly Abaıdyń ósıetterine qaıta oralyp, onyń «dushpandyq – keıis emes, ne kúndestik, ne tynysh otyra almaǵandyq» degen oıly sózderin eske alýymyz qajet.
Qańtardaǵy oqıǵalar qoǵamnyń jasampazdyq turǵyda jańarýyna, tazarýyna jáne ádilettilik uǵymdaryna oralýǵa, jaqsylyq pen jamandyqty ajyratýǵa, halyqqa qyzmet etýdiń kategorııalyq ımperatıvine serpin berdi. Sondyqtan biz ómirin qıyp, osy kúnderi elimizdi, halqymyzdy jáne táýelsizdigimizdi qorǵaǵan barlyq azamattarǵa Alǵys aıtý kúninde aıryqsha qurmet bildirip, olardy eske alýymyz óte mańyzdy.
Qazaqstan azamattaryn jáne konstıtýsııalyq tártipti qorǵaı otyryp, aýyr synaq kúnderi ózderiniń qyzmettik paryzyn oryndap jáne azamattyq erlik tanytyp terrorıster jolyn keskenderge biz qurmet kórsetemiz jáne alǵysymyzdy bildiremiz.
Halqynyń turaqty jáne qaýipsiz Qazaqstanda ómir súrý quqyǵy úshin quqyqtyq tártip organdarynyń 19 qyzmetkeri men áskerı qyzmetshiler óz ómirlerin qıdy. Búgin biz olardyń jarqyn erlik isteri aldynda basymyzdy ıemiz. Sondyqtan da alǵys aıtý uǵymy – mańyzdy azamattyq mánge jáne áleýmettik júktemege, tereń jáne jan-jaqty sıpatqa ıe bolyp otyr.
Biz osy qaıǵyly kúnderde, qaýipke qaramastan, ózderiniń kásibı boryshtaryn sońyna deıin oryndaǵan azamattarǵa alǵys aıtamyz jáne qurmet kórsetemiz.
Biz órt sóndirý, jalyndaǵan telestýdııalardan aqparatpen qamtamasyz etý, jaralylardy qutqarý, bizdiń úılerimizdi jaryq, sý, jylýmen qamtamasyz etý úshin barlyq múmkindikter men rezervterdi paıdalanǵan órt sóndirýshiler, respýblıkalyq jetekshi telearnalardyń jýrnalısteri, jedel járdem dárigerleri, strategııalyq nysandardyń qyzmetkerleri týraly aıtyp otyrmyz.
Elimizdiń barlyq óńirlerinde azamattardy izdestirý, psıhologııalyq jáne gýmanıtarlyq kómek kórsetý jumystaryn jedel júrgizip, blok-beketterge, gospıtaldarǵa, áleýmettik qorǵalmaǵan azamattarǵa ystyq tamaq jetkizgen volonterler shynaıy alǵys bildirýge laıyqty.
Qaıyrymdylyq, volonterlik aksııalaryna Qazaqstan halqy Assambleıasynyń, etnomádenı, jastar, volonterlik uıymdarynyń, qoǵamdyq qozǵalystardyń, klýbtardyń jáne basqa da qoǵamdastyqtardyń myńdaǵan músheleri, sondaı-aq halqymyzdyń myzǵymas birliginiń, onyń yntymaqtastyǵy men ózara qamqorlyǵynyń sımvolyna aınalǵan janashyr azamattar qatysty.
Zardap shekkender úshin qan tapsyrǵan donorlar úlken rızashylyqqa laıyqty.
Olardyń barlyǵy halqymyzdyń naǵyz patrıottary!
Mine, sondyqtan da alǵys bildirý uǵymy meıirimdilik, batyldyq pen batyrlyq, azamattyq erligi úshin óz otandastaryna qoǵamnyń ádil rızashylyǵynyń maǵynasyn qamtıdy. Árıne, jaǵdaıdy turaqtandyrý sharalaryn qoldaǵan, patrıotızm men birlik tanytqan azamattarymyz shynaıy alǵysqa laıyqty.
Bul azamattyq qatystylyq ulttyń tereń genetıkalyq jadyna ene otyryp, halqymyzdy, birligimizdi nyǵaıta túsetin qıynshylyqtardy birlesip eńserýdiń mańyzdy sátine aınaldy. Bul jóninde «Jol qýǵan qazynaǵa jolyǵar, daý qýǵan pálege jolyǵar» degen qazaq maqaly da bar.
Jańa Qazaqstandy qura otyryp, biz qoǵamda ózara kómek kórsetýdi jáne halyqtyń myzǵymas birligin keńeıtýge baǵyttalǵan bastapqy dástúrlerdi, qundylyqtardy birinshi orynǵa qoıamyz.
Bizdiń ortaq ıdeıamyz – «Jańa Qazaqstan» joǵary adamı qasıetterge: azamattyq batyldyqqa, óz is-áreketteri úshin jaýapkershilikke jáne ortaq maqsat jolyndaǵy uıymshyldyqqa negizdelgen.
Marat ÁZILHANOV,
QHA Tóraǵasynyń orynbasary – Hatshylyq meńgerýshisi
