«Halyqtyń Úkimet músheleri men ákimderge degen senim máselesin kóterý kerek. Barlyq deńgeıdegi partııa depýtattarynyń reıtıngteri, eń aldymen, daıyndalǵan esepterge emes, naqty isterge, azamattardyń máselelerin sheshýge negizdelýi tıis», dedi Qasym-Jomart Toqaev «Amanat» partııasynyń XXII sezinde.
Prezıdenttiń aıtýynsha, barlyq saılaý toptaryna olardyń jaýapkershilik aıasyn keńeıtý úshin fraksııa depýtattarynyń arasynan kýratorlardy bekitý qajet.
«Jaqynda Májilis depýtattary óńirlerdi aralap keldi. Men bul jumysty baqylap otyrdym, olardyń jumysynda jańa stıl, jańa mazmun paıda bola bastady, bul qazirdiń ózinde kórinip tur. Resmı otyrystar az boldy, saılaýshylarmen tikeleı baılanys kóp boldy. Depýtattar jergilikti jerlerdegi azamattardyń naqty máselelerine ene bastady. Mundaı tásildi barynsha nyǵaıtyp, damytý qajet», dep túıindedi Memleket basshysy.
