Oblys basshysy Gúlshara Ábdiqalyqova ákimdik tarapynan Aýyl sharýashylyǵy mınıstrligine jerdi memleket menshigine qaıtarý týraly birneshe ret usynys jasalǵanyn aıtyp ótti. Endi shyǵyn kólemi anyqtalyp, tıisti saraptama júrgiziledi. Zańǵa sáıkes taratý komıssııasy qurylady, onyń quramyna barlyq múddeli organ men turǵyn kiredi. Qajetti rásimder júrgizilgennen keıin tájirıbelik sharýashylyq joıylyp, onyń jeri jergilikti atqarýshy organ teńgerimine qaıtarylady.
Mınıstr men ákim Qyrkeńse aýyldyq okrýgindegi «Bekarys-S» sharýa qojalyǵyna baryp, kóktemgi egis barysymen de tanysty. Byltyr kúrishten 57 sentnerden ónim alǵan qojalyq osy jyly jańa sort ekpekshi.
Osy kúni aýdan ortalyǵynda kóktemgi egis naýqany men mal sharýashylyǵyn damytý máselelerine arnalǵan jıyn ótkizildi.
«Báıterek» ulttyq basqarý holdıngi» AQ basqarýshy dırektory Aıgúl Jýanyshbaeva, «QazAgroQarjy» AQ basqarma tóraǵasy Aıdar Prashev, «Agrarlyq nesıe korporasııasy» AQ basqarma tóraǵasynyń orynbasary Asylhan Jubashev, aýdandaǵy sharýashylyq ıeleri qatysqan jıynda oblys basshysy sýdy meılinshe az qajet etetin ónim túrine den qoıý, Úkimet bekitken sý lımıtine qaraı áreket etý, kanaldardy tazalaý, nasos qondyrǵylaryn ornatý baǵytyndaǵy jumystardy saralady.
– Bıyl da ótken jylǵydaı sý tapshylyǵyn tartatyn túrimiz bar. Bul eginmen qatar jaıylymdyqtar men shabyndyqtardy sýlandyrýǵa áser etetini sózsiz. Osyǵan baılanysty Úkimet rezervinen bólingen qarajatqa 21 kanal tazalap, 52 uńǵymany jóndeý jáne burǵylaý, 133 dana nasos qondyrǵysyn alý josparymyzda bar. Osyǵan baılanysty eldegi sharýalarmen kezdesip, lımıt aıasynda egiletin ónim kólemin naqtylaýda ortaq sheshimge kelý úshin talqylaýlar uıymdastyrdyq. Ońtústik aýdandarda kókónis shyǵymy joǵary. «Baıqońyr» ÁKK» AQ-men birlesip, qajetti kartop, sábiz, pııaz jáne basqa da ónimderdi egip, turaqtandyrý qoryna usynyp, syrttan ónim alýǵa degen táýeldilikti azaıtýǵa jumys istegenimiz jón, – dedi G.Ábdiqalyqova.
Jıynda tıisti basqarma basshylary vegetasııalyq kezeńde iske asyrylýǵa tıis jumystar josparyn baıandasa, Jańaqorǵan aýdanynyń ákimi Rýslan Rústemov egiske daıyndyq barysyn aıtyp, Kelintóbe magıstraldy kanalynyń bas saǵasyna sý tospasyn salýdy usyndy. Birqatar sharýa qojalyq ıeleri sýbsıdııa alý, jemshóp tasymaldaý, sý qoryna qatysty saýaldar qoıyp, usynystaryn jetkizdi.
Basqosýda kóterilgen árbir usynysty tyńdaı kele Aýyl sharýashylyǵy mınıstri Erbol Qarshókeev sharýalardy alańdatqan máselelerge qatysty naqty jaýap berdi.
– Bıyl Prezıdent tapsyrmasy negizinde kóktemgi egis jumystaryna bólinetin qarajat kólemi ulǵaıdy. Birinshiden, «Keń dala» baǵdarlamasy arqyly jyl saıyn 70 mlrd teńge qarajat bólinse, osy jyly sony eki esege ulǵaıtýǵa múmkindik alǵaly turmyz. Azyq-túlik kelisimshart korporasııasy arqyly forvardtyq satyp alý úshin jyl saıyn 40 mlrd teńge bólinse, onyń kólemin 80 mlrd teńgege ulǵaıtyp jatyrmyz, – dedi mınıstr.
Bıylǵy kúrdeli kezeńdi eskerip, sýbsıdııa alý tártibiniń jańa erejesi kelesi jyldyń 1 qańtaryna qaldyryldy. Demek sýbsıdııa eski júıe boıynsha beriledi. Osy jyly bul úshin 309 mlrd tenge aqsha qarastyrylǵan edi. Prezıdent tapsyrmasyna sáıkes qarajat kólemin 388 mlrd teńgege ulǵaıtý týraly usynys berildi. Mınıstr bul byltyrdan qalǵan qaryzdy óteýge múmkindik berip, aýylsharýashylyq óniminiń baǵasyn turaqty ustaýǵa septigin tıgizetinin atap ótti. Sonymen birge, sýbsıdııalaýdyń biryńǵaı aqparatyn engizetin jańa júıe daıyndaldy. Endi fermerlerden artyq qujat talap etilmeıdi. Barlyǵy avtomatty túrde iske asyrylady.
Sapar sońynda Erbol Shyraqpaıuly Shıeli aýdanyndaǵy «Móldir jáne K» seriktestiginiń qus fermasyna bardy. Kásipker Nasyrbek Myrzabekov «Bıznestiń jol kartasy – 2020» memlekettik baǵdarlamasy arqyly nesıe alyp, óndiris ornyndaǵy ekinshi sehty iske qosqan. Táýligine 20 myń dana jumyrtqa alatyn fermada aldaǵy ýaqytta qus etin óndirý josparlanyp otyr.
Qyzylorda oblysy
