Qurmetti túlekter!
Eki aıdan keıin mektepti aıaqtap, jańa ómirge qadam basqaly otyrsyzdar.
Mektep qabyrǵasynda júrgende ustazdaryńyz sizderge bilim men tárbıeni qatar úıretti. Ata-analaryńyz da únemi keńesterin aıtyp, durys jol siltep otyrdy. Endi boılaryńyzǵa sińgen osy qasıetterdi paıdalanyp, ómirlerińizdegi jaýapty sheshimdi qabyldaısyzdar.
Árıne, sizder úshin alǵashqy mańyzdy emtıhannyń biri - ol UBT. Biraq UBT ómirdegi eń jeńil, ońaı synaqtyń biri ekenin aıtqym keledi.
Oqýshylardyń UBT-dan qıyndyqsyz ótýi úshin qosymsha sharalardy qabyldadyq.
1. UBT-ny elektrondy formatqa kóshirip, ony barynsha ádil ettik. Ornatylǵan kameralar, proktorıng jáne translıasııa júıesi túlekterge kedergi keltirmeýi kerek. Sebebi bul shara UBT-nyń ádil jáne ashyq ótýi úshin engizildi.
2. UBT jylyna bir ret emes, 4 ret ótkiziledi. Bul jumysqa áriptesterimiz kóp kúsh-jiger jumsasa da, biraq ol túlekterdiń kúızelisin azaıtyp, ýnıversıtetke túsýine birneshe múmkindik beretinin bilemiz.
3. Erekshe qajettilikteri bar balalarǵa da arnaıy jaǵdaı jasaldy. Bıyldan bastap olarǵa tapsyrmalardy oryndaý úshin qosymsha 40 mınýt bólindi. Sondaı-aq tapsyrmalar sýretsiz, syzbalarsyz jáne dıagrammalarsyz berildi.
4. Endi test tapsyrýshylarǵa kalkýlıatorlardy turaqty túrde paıdalanýǵa ruqsat etiledi.
5. Bıyl sizderge UBT upaılary ǵana emes, sonymen qatar ár pán boıynsha nátıjelerdiń taqyryptyq taldaýy beriledi. Bul sizderdiń álsiz tustaryńyzdy taldaýǵa jáne bilimderińizdi jetildirýge kómektesedi.
6. Prezıdenttiń qoldaýynyń arqasynda grantqa túsýge múmkindik artyp otyr. Bıyl qosymsha 15 myń grant bólinip, stıpendııa mólsheri 15 paıyzǵa ósti.
7. Jaqsy jańalyq ta bar. Instagramda meni belgilep, grantqa túsý úshin bir emes, eki ret UBT tapsyrý týraly ótinish jazyp júrgenderińizdi bilemin. Sheshim qabyldaý kezinde biz oqýshylardyń usynysyn, qyzyǵýshylyǵyn nazardan shyǵarmaýǵa tyrysamyz. Sol sebepti osy joly da sizderdiń usynystaryńyz boıynsha sheshim qabyldadyq. Iаǵnı endi sizder eki ret UBT tapsyryp, grantqa túsýge múmkindik alasyzdar. Bul shara emosıonaldy stress deńgeıin tómendetetinine senimimiz mol.
Qymbatty túlekter! UBT synaǵynan súrinbeı ótýlerińizge tilektespin. Bilimderińizdiń arqasynda joǵary nátıjege qol jetkizip, grantqa ıe bolyńyzdar! Barshańyzǵa sáttilik tileımin!
Qadirli dostar! «Qandaı ýnıversıtetti tańdap, qaıda oqyǵan durys?»- dep te oılap júrgen bolarsyzdar?
Osy rette birneshe keńesimmen bólisýdi jón sanap otyrmyn:
Birinshi. JOO-nyń jumys berýshiler reıtıngindegi ornymen, kadr quramymen, oqý jaǵdaılarymen tanysyńyz.
Ekinshi. Qandaı baǵdarlama boıynsha oqý júrgiziletinin qarańyz. Sondaı-aq mamandyqtardyń ataýy birdeı estilip, biraq mazmuny aıtarlyqtaı ózgeshe bolýy múmkin. Sol sebepti úzdik álemdik tájirıbege súıene otyryp, ýnıversıtetterdiń barlyq baǵdarlamasynyń tizilimin jasadyq. Endi ol bárine qoljetimdi.
Úshinshi. Ýnıversıtettiń bedelin baǵalańyz. Qazir JOO-lar óz úlgisindegi dıplomdardy beredi. Degenmen ýnıversıtet beretin dıplomnyń qaǵazynan buryn, onyń qandaı mamandy daıyndap shyǵaratyny mańyzǵa ıe.
Tórtinshi. Ýnıversıtettiń akkredıtasııasyna nazar aýdaryńyz. Eger ol eń myqty akkredıtteý uıymdarynan ótse, onda sapanyń bolatynyna senýge bolady.
Besinshi. Ýnıversıtetti tańdaý kezinde sizdi kúmándi arzan oqý nemese sabaqqa qatyspaý múmkindigi sııaqty oılar qyzyqtyrmaýy mańyzdy. Sebebi jumys berýshiler dıplomdy jaramsyz dep tanyp, qarajatyńyz ben ýaqytyńyz bosqa shyǵyn bolýy múmkin.
Altynshy. Qazaqstandyq JOO-ny tańdaýǵa keńes beremin. Bizdiń ýnıversıtetterdiń sapasy kórshi elderdiń kóptegen ýnıversıtetinen asyp túsetinin senimmen aıta alamyn.
Endi bolashaq mamandyqty tańdaýǵa qatysty da aıta keteıin. Jınaǵan ball kólemine nemese basqa bir faktorlarǵa baılanysty qabyldanǵan sheshim qate ekenin este saqtańyz.
Oqý men kásiptiń 3 túri úlken áleýetke ıe dep oılaımyn:
1. Jas muǵalim. Qazir bul mamandyq turaqtylyqtyń kepiline aınaldy.
Elimizde jaqsy muǵalimderge suranys óte joǵary. Qazir jalaqy da, damý men mansaptyq ósý múmkindikterine de jaǵdaı jasalǵan. Sonymen qatar osy baǵytqa 9,5 myń grant bólinip, eń joǵary stıpendııa taǵaıyndalady, odan bólek, jalaqy jyl saıyn 25 paıyzǵa ósip otyrady.
2. Jas ınjener. Prezıdent tehnıkalyq mamandyqtardyń mańyzdylyǵyn atap ótken bolatyn. Myqty ınjener bolsańyz, onda siz kez kelgen jerde básekege qabiletti bolasyz. О́zderińiz biletindeı, júzdegen jas qazaqstandyq Google, Amazon jáne álemge áıgili basqa da kompanııalarda jumys isteıdi.
3. Jas ǵalym. Qazaqstan ǵylymy qarqyndy damyp keledi. Otandyq ǵalymdar QazVac vaksınasyn jasady. Sondaı-aq jas ǵalymdar búkil álem boıynsha ǵylymı jarystarda aldyńǵy oryndarda. Olardyń jobalaryna sheteldik kompanııalar seriktestik usynyp júr. Odan bólek, biz ǵalymdarǵa barynsha qolaıly jaǵdaı jasap jatyrmyz. Atap aıtqanda, ǵylymı granttar bólý, sheteldik ǵylymı ortalyqtarda taǵylymdamadan ótý jáne t.b. Sizderdiń aralaryńyzdan da Sátbaev isin jalǵastyrýshy myqty ǵalym shyǵýy ábden múmkin.
Qurmetti túlekter!
Sizderge Jańa Qazaqstandy qurýǵa tamasha múmkindik berilip otyr.
Sizderdiń ıdeıalaryńyz, maqsattaryńyz ben talpynystaryńyzdyń arqasynda elimiz odan ári damı túsetinine senimdimin.
Qandaı jaǵdaı bolsyn, joǵary kásibı mamandar árqashan suranysqa ıe. Osyny esten shyǵarmańyzdar.
Eńbekqorlyq pen súıikti ispen aınalysýǵa degen talpynys bolsa, temirjolshy bolyp ta juldyz atanýǵa bolady.
О́zińizge jáne kúsh-jigerińizge senińiz. Bilimniń asýlaryn baǵyndyryp, izdenýden talmańyz. Ýaqytty bosqa ótkizbeýge tyrysyńyz. Ony jańa bilim men daǵdyny úırenýge jumsańyz.
Bastysy ómir jolyńyzda qandaı qıyndyqtar týyndasa da, onyń barlyǵyn jeńýge bolatynyn árdaıym esińizde ustańyz.
