Qazir Batys Qazaqstan oblysynda sý tasqyny kezinde halyqqa kómek kórsetýge arnalǵan volonterlik shtab quryldy. Qaratóbe, Jánibek, Shyńǵyrlaý jáne Bórli aýdandarynynyń árqaısynda 30 adamnan quralǵan volonterlik toptar qyzmet atqarýda. Sonymen qatar Oral qalasynda da 100-den astam erikti kómek kórsetýge daıyn otyr. Shtab qazir halyqtan kıim-keshek, tez buzylmaıtyn taǵamdar, dárilik jáne jeke gıgıenalyq zattar men basqa da alǵashqy kerek zattardy qabyldap, zardap shekkenderge jetkizýdi uıymdastyryp jatyr. «Aqjaıyq» jeke qoryna el-jurttan aqshalaı qarjy da jınalýda.
«AMANAT partııasynyń tarapynan depýtattardyń jáne fılıal qyzmetkerleriniń kómegimen 4 sáýir kúni tańǵy 9-ǵa deıin 1 199 027 teńge jınaldy» dep habarlady partııa fılıalynyń ókili Gaýhar Shaıhınııazova.
Sáýirdiń 4-i kúngi túske deıingi málimet boıynsha Batys Qazaqstan oblysynda 140 úı, 2 áleýmettik nysanǵa sý kirip, 168 bas mal shyǵyn bolǵany habarlandy. Sý basqan úılerden 751 adam kóshirilgen, onyń 215-i – balalar.
Dál qazir 6 aýdanda sý tasqynynyń aldyn alý úshin 770 adam, 100-ge jýyq tehnıka jumyldyrylǵan. Bulardyń ishinde Mańǵystaý oblysynan kelgen 43 adam, Atyraý oblysynan kelgen 49 qutqarýshy bar.
Jánibek aýdany
3-sáýir kúni Reseı shekarasy jaǵynan daladan kelgen qarǵyn sý Jaqsybaı aýylynyń 97 úıine kirip ketken edi. qazir sý deńgeıi túsken, biraq 53 úı áli sý ishinde tur. Qaýipti jerden 639 adam kóshirilgen. Onyń 305-i aýyldaǵy orta mekteptiń úsh qabatty ǵımaratyna ýaqytsha ornalasty. Tilsiz jaýdyń kesirinen aýylda 39 sıyr, 68 qoı-eshki, 1 at ólgen. Qazir halyqqa materıaldyq zardap shyǵyndaryn qalaı esepteý kerektigi jóninde zań talaptary túsindirilip jatyr.
Osy aýdannyń Talov aýylynda da 2 úı sý ishinde qalǵan edi. munda turatyn 8 adam da qaýipsiz jerge ornalastyryldy.
Jaqsybaı aýylynda turatyn aıaǵy aýyr eki kelinshek «Qazavıaqutqarý» mekemesiniń tikushaǵymen qaýipsiz jerge kóshirildi.
Shyńǵyrlaý aýdany
Shyńǵyrlaý ózeniniń deńgeıi 3 sáýir kúni qaýipti shekke deıin kóteripi, Aqshat aýylyndaǵy 7 úıdi basyp qalý qaýpi tóngen bolatyn. Jedel sharalar uıymdastyrylyp, qum salynǵan qapshyqtarmen bógelip, kezekshilik uıymdastyryldy. Sý aǵynyna kedergi bolǵan muz oıylyp, aýyldaǵy 50 sıyr, 50 jylqy, 39 qoı-eshki qaýipsiz jerge aıdalǵan.
Aýdan aýmaǵyndaǵy Shyńǵyrlaý-Shoqtybaı, Shyńǵyrlaý-Taldysaı dala joldarynyń, Almaz aýylyna kireberis bóget-kópirdiń buzylǵanyn buryn habarlaǵan edik. Bul joldardy qalpyna keltirý tasqyn qaýpi seıilgen soń qolǵa alynady.
Almaz aýylynda qulaǵan qoranyń astynda 15 ýaq jandyq (qoı-qozy) ólgen. Sý basqan turǵyn úı joq.
Qaratóbe aýdany
Qoskól aýyldyq okrýgine qarasty Shalǵyn aýylynda bolǵan tabıǵı apat týraly budan buryn da birneshe márte habarladyq. Erigen qar sýy men Shıli ózeni deńgeıiniń kóterilýinen aýylda 29 úı, mektep pen dárigerlik ambýlatorııa sýǵa ketti. 45 qoı-eshki óldi. Qazir sý aqyryn sheginip keledi. Aýyldan 96 adam, sonyń ishinde 50 bala Oral qalasyna, Qoskól aýylyna kóshirildi.
3 sáýir kúni aýdan ortalyǵy Qaratóbe kentinde de Qaldyǵaıty ózeni kúrt kóterilip, shetki úılerdi sý basý qaýpi tóngen. Bul jerge kezekshilik uıymdastyrylyp, jaǵalaý 3 myń qapshyq qummen, topyraqpen bekitildi. Oqıǵa ornynda jergilikti tótenshe jaǵdaı mekemesiniń qyzmetkerleri jaǵdaıdy kúni-túni baqylaýda ustap otyr.
Bórli aýdany
3 sáýir kúni túnde Keńtúbek aýyldyq okrýgine qarasty Baqtyaral aýylyn Shyńǵyrlaý ózeniniń sýy basyp qala jazdaǵanyn budan buryn da habarlaǵan bolatynbyz. Qaýip tóngen turǵyn úılerden 20 adam qaýipsiz jerge shyqty. Kezekshilik uıymdastyrylyp, qaýiptiń beti qaıtty. Masaıtóbe aýyly mańynda bógelgen muz seńin tótenshe jaǵdaı qyzmetkerleri buzyp, eldi mekenge tóngen qaýipti seıiltti.
Tasqala aýdany
Tasqala aýdanynda sý basý qaýpi bar jerler qum salynǵan qapshyqtarmen bekitilip, sý joldary qar men kóldeneń zattardan tazartylyp jatyr. Jedel shtabtyń málimdeýinshe, qazir 1100 qap qum qoıylyp, 2560 tekshemetr sý sorylǵan. Deńgeıi kúnnin kúnge kóterilip kele jatqan Derkól ózeni únemi baqylaýda.
Terekti aýdany
3 sáýir kúni keshkisin Terekti aýdanynda respýblıkalyq mańyzy bar Oral-Orynbor avtojolynyń bir bóligin erigen qar sýy basyp ketti. «QazaqAvtoJol» mekemesiniń qyzmetkerleri kúshimen jol jıegi ınertti materıaldarmen, qum salynǵan qaptarmen bekitilip, jol qozǵalysna nuqsan kelmedi. Sý aǵýy 4 sáýir kúni túnde toqtady.
P.S. О́ńirdegi negizgi sý qoımalary, ózen-kól deńgeıi udaıy baqylaýda. Ásirese Tasqala men Báıterek aýdandary, Oral qalasynyń mańy erekshe nazarda. Aıta keteıik, atalǵan soltústik aýdandardyń qary endi-endi erı bastady.
«Qazgıdromet» mekemesiniń habarlaýynsha, oblystyń kóp jerinde jańbyr jaýady. Aýa temperatýrasy túnde 5-10, kúndiz 10-15 gradýs jylylyqty kórsetip tur. Kún raıyn boljaýshylar 2-6 sáýir aralyǵynda ózen-kólderdiń deńgeıi kóteriledi dep eskertip otyr.
Batys Qazaqstan
