Tórt aýdanda tótenshe jaǵdaı jarııalandy

Qazir oblysta sý tasqyny kezinde halyqqa kómek kórsetýge arnalǵan volonterlik shtab qu­ryldy. Qaratóbe, Jánibek, Shyńǵyrlaý jáne Bórli aýdan­darynyń árqaısynda 30 adamnan quralǵan volonterlik toptar qyzmet atqarýda. Sonymen qatar Oral qalasynda da 100-den astam erikti kómek kórsetýge daıyn. Shtab halyqtan kıim-keshek, tez buzylmaıtyn taǵamdar, dárilik jáne jeke gıgıenalyq zattar jáne basqa da alǵashqy kerek zattar­dy qabyldap, zardap shekkenderge jetkizýdi uıymdastyrýda. «Aq­jaıyq» jeke qoryna el-jurttan aq­shalaı qarjy da jınalyp jatyr.

«Amanat partııasynyń tarapynan depýtattardyń jáne fılıal qyzmetkerleriniń kómegimen 4 sáýir kúni tańǵy 9-ǵa deıin 1 199 027 teńge jınaldy» dep habarlady partııa fılıalynyń ókili Gaýhar Shaıhınııazova. Aıta ketý kerek, Májilis depýtattary da kómek qolyn sozǵan.

Sáýirdiń 4-i kúngi túske deıingi málimet boıynsha oblysta 140 úı, 2 áleýmettik nysanǵa sý kirip, 168 bas mal shyǵyn bolǵany habarlandy. Sý basqan úılerden 751 adam kóshirilgen, onyń 215-i – balalar. Dál qazir 6 aýdanda sý tasqynynyń aldyn alý úshin 770 adam, 100-ge jýyq tehnıka jumyldyrylǵan. Bulardyń ishinde Mańǵystaý oblysynan kelgen 43 adam, Atyraý oblysynan kelgen 49 qutqarýshy bar.

Jánibek aýdany

3 sáýirde Reseı shekarasy jaǵy­nan daladan kelgen qarǵyn sý Jaq­sy­baı aýylynyń 97 úıine kirip ketken edi. Qazir sý deńgeıi túsken, biraq 53 úı áli sý ishinde tur. Qaýipti jerden 639 adam kóshirilgen. Onyń 305-i aýyldaǵy orta mekteptiń úsh qabatty ǵımaratyna ýaqytsha ornalasty. Tilsiz jaýdyń kesirinen aýylda 39 sıyr, 68 qoı-eshki, 1 jylqy ólgen. Qazir halyqqa materıaldyq zardap shyǵyndaryn qalaı esepteý kerektigi jóninde zań talaptary túsindirilip jatyr. Osy aýdannyń Talov aýylynda da 2 úı sý ishinde qalǵan edi. Munda turatyn 8 adam da qaýipsiz jerge ornalastyryldy. Jaqsybaı aýylynda turatyn aıaǵy aýyr eki kelinshek «Qazavıaqutqarý» mekemesiniń tikushaǵymen qaýipsiz jerge kóshirildi.

Shyńǵyrlaý aýdany

Shyńǵyrlaý ózeniniń deńgeıi 3 sáýirde qaýipti shekke deıin kóte­ri­lip, Aqshat aýylyndaǵy 7 úıdi basyp qalý qaýpi tóndi. Jedel qum salynǵan qapshyqtarmen bógelip, kezekshilik uıymdastyryldy. Sý aǵy­nyna kedergi bolǵan muz oıy­lyp, aýyldaǵy 50 sıyr, 50 jyl­qy, 39 qoı-eshki qaýipsiz jerge aı­dal­ǵan. Aýdan aýmaǵyndaǵy Shyńǵyrlaý-Shoqtybaı, Shyń­ǵyrlaý-Taldysaı dala jol­da­ry­nyń, Almaz aýylyna kireberis bóget-kópirdiń buzylǵanyn buryn habarlaǵan edik. Bul joldardy qalpyna keltirý tasqyn qaýpi seıil­gen soń qolǵa alynady. Almaz aýy­lynda qulaǵan qoranyń astynda 15 ýaq jandyq (qoı-qozy) ólgen. Sý basqan turǵyn úı joq.

Qaratóbe aýdany

Qoskól aýyldyq okrýgine qarasty Shalǵyn aýylynda bolǵan tabıǵı apat týraly budan buryn habarladyq. Erigen qar sýy men Shıli ózeni deńgeıiniń kóterilýinen aýylda 29 úı, mektep pen dárigerlik ambýlatorııa sýǵa ketti. 45 qoı-eshki óldi. Qazir sý aqyryn sheginip keledi. Aýyldan 96 adam, sonyń ishinde 50 bala Oral qalasyna, Qoskól aýylyna kóshirildi. 3 sáýir kúni aýdan ortalyǵy Qaratóbe kentinde de Qaldyǵaıty ózeni kúrt kóterilip, shetki úılerdi sý basý qaýpi tóngen. Bul jerge kezekshilik uıym­dasty­rylyp, jaǵalaý 3 myń qapshyq qummen, topyraqpen bekitildi. Oqıǵa ornynda jergilikti tótenshe jaǵdaı mekemesiniń qyzmetkerleri jaǵdaıdy kúni-túni baqylaýda ustap otyr.

Bórli aýdany

3 sáýirde kúni túnde Keńtúbek aýyl­dyq okrýgine qarasty Baqtyaral aýylyn Shyńǵyrlaý ózeniniń sýy basyp qala jaz­da­ǵanyn budan buryn da ha­bar­laǵan edik. Qaýip tón­gen turǵyn úılerden 20 adam qa­ýip­siz jerge shyqty. Kezekshilik uıymdastyrylyp, qaýiptiń beti qaıtty. Masaıtóbe aýyly mańynda bógelgen muz seńin tótenshe jaǵdaı qyzmetkerleri buzyp, eldi mekenge tóngen qaýipti seıiltti.

Tasqala aýdany

Tasqala aýdanynda sý basý qaýpi bar jerler qum salynǵan qapshyqtarmen bekitilip, sý joldary qar men kóldeneń zattardan tazartylyp jatyr. Jedel shtabtyń málimdeýinshe, qazir 1 100 qap qum qoıylyp, 2 560 tekshe metr sý sorylǵan. Deńgeıi kúnnen-kúnge kóterilip kele jatqan Derkól ózeni únemi baqylaýda.

Terekti aýdany

3 sáýirde keshkisin Terekti aýdanynda respýblıkalyq mańyzy bar Oral-Orynbor avtojolynyń bir bóligin erigen qar sýy basty. «QazaqAvtoJol» mekemesiniń qyz­met­kerleri kúshimen jol jıegi ıner­tti materıaldarmen, qum sa­lyn­ǵan qaptarmen bekitilip, jol qozǵalysna nuqsan kelmedi. Sý aǵýy 4 sáýir kúni túnde toqtady.

P.S. О́ńirdegi negizgi sý qoımalary, ózen-kól deńgeıi udaıy baqylaýda. Ásirese Tasqala men Báıterek aýdandary, Oral qalasynyń mańy erekshe nazarda. Aıta keteıik, atalǵan soltústik aýdandardyń qary endi-endi erı bastady. «Qazgıdromet» mekemesiniń habarlaýynsha, oblystyń kóp jerinde jańbyr jaýady. Aýa temperatýrasy túnde 5-10, kúndiz 10-15 gradýs jylylyqty kórsetip tur. Kún raıyn boljaýshylar 2-6 sáýir aralyǵynda ózen-kólderdiń deńgeıi kóteriledi dep eskertip otyr.

Batys Qazaqstan oblysy