Bıyl kóktem kesh keldi. Jylý da jyldaǵy qalypty deńgeıden joǵary. Qasat qardyń kóbesi birden sógilip, jyldam erýde. Bul jaǵdaıdy qıyndata túsýi ábden yqtımal. Erigen qar sýy burnaǵy jyldary ózen ańǵarynan asyp ketip, zardap shekken Selınograd aýdanynyń eldi mekenderinen 200 myń tekshe metrge jýyq sý soryldy.
– Departamenttiń qosymsha qyzmetteri aýdanǵa sáýirdiń basynda kelgen bolatyn, – deıdi departament bastyǵynyń orynbasary Qanat Dospaev, – qazir sýdyń mólsheri arta túsýde. Qosymsha sharalar qabyldadyq. Egistik alqaptarynan erigen sý aýyl arqyly óte bastady. Qoıandy aýylynda jeke quramnyń 51 adamy, 10 tehnıka men 8 motopompa jumys isteýde. Mınıstrliktiń sheshimi boıynsha, azamattyq qorǵanys polkynyń kúshteri de tartylýda. Jergilikti atqarýshy organdarmen birlese otyryp, eldi meken turǵyndarynyń ótinimderi de turaqty nazarǵa alynǵan.
Aýdannyń Talapker, Qaraótkel, Qoıandy, Araıly, Qarajar, Qyzyljar, Aqmol, Qabanbaı batyr, Qyzylsýat jáne Jarlykól eldi mekenderinde erigen qar sýyn sorý jumysy jiti júrgizilýde. Ázirge eshbir nysandardy sý basqan joq.
Sandyqtaý aýdany da saqtyq sharalaryn kúsheıte túsken. Bul óńirde 10 eldi meken qaýipti aımaq sanatynda. Olardyń jeteýi jyl saıyn tasıtyn Jabaı ózeniniń jaǵalaýynda ornalasqan. Jylandy ózeniniń boıynda Bastrymovka jáne Novoselovka eldi mekenderi irge tepken. Qos ózenniń boıyndaǵy eldi mekenderdegi halyqpen tikeleı jumys júrgizilip, oıpań jerlerdiń kestesi jasaldy. «BVR Tehnoservıs» seriktestigi 4500 sharshy metr muzdy jaryp, erigen ózen sýy erkin aǵyp ótip ketetindeı jaǵdaı jasady.
Qyzyl sýdyń qaterin seıiltý maqsatynda aýdannyń eldi mekenderinen 73 700 tekshe metr qar shyǵaryldy, 17,5 shaqyrym kanal boıy jóndeldi, 9,1 shaqyrym shamasyndaǵy aryqtar tazalandy, janar-jaǵar maı qory jınaqtaldy. Aýdanishilik joldardyń 31 tusynda sý ótýge qajetti qubyrdyń boıy tazalandy. Táýlik boıy jumys isteıtin kezekshilik uıymdastyrylyp, arnaıy shtab quryldy. Aýyl sharýashylyǵy alqaptarynan aǵyp keletin sýdy qaýipsiz baǵytqa aýdarý úshin 20 motopompa daıyndaldy. Oqys oqıǵalar oryn ala qalatyn bolsa, qaýiptiń betin qaıtarý úshin 18 birlik tehnıkasy, quramynda 57 adamy bar top quryldy. Alty aýyldyq okrýgte mobıldik top jasaqtaldy.
Tótenshe jaǵdaıdy eskertý jáne ózge de qajettilikterge qarjy bólindi. О́zenniń muzyn jaryp, ańǵaryn keńeıtýge 1 mln 500 myń teńge kóleminde qarajat qarastyryldy. 490 tonna ınertti materıal daıyndaldy. Ishine qum salǵan qaptar da qajet bola qalsa, kádege asyrylmaq.
– Qyzyl sýdyń jolyn bógep, qaýiptiń aldyn alýǵa muqııat daıyndaldyq, – deıdi Sandyqtaý aýdanynyń ákimi Erbol Júsipbekov, – qazir qar kúrt erip jatyr, sý mólsheri de kúnnen-kúnge molaıa túsýde.
Dál osyndaı synaqtan qapysyz qamdanǵanda ǵana súrinbeı ótetinimiz anyq. Syn saǵatta sergek qımyldap, serpindi áreket etpeı bola ma?!
Aqmola oblysy
