Nysannyń ashylý saltanatyna Batys Qazaqstan oblysy ákimi Ǵalı Esqalıev bastaǵan oblys basshylary, QPO jáne merdiger uıymdardyń basshylyǵy, Oral qalasy jurtshylyǵynyń ókilderi qatysty.
Oblys ákimi Ǵalı Esqalıev quttyqtaý sózinde «halyqaralyq áýejaıdyń jańa termınalynyń ashylýy – oblys turǵyndary úshin ǵana emes, búkil elimiz úshin aıtýly oqıǵa», dep atap ótti.
«Termınal – óte kúrdeli nysan. Bul jobany jergilikti qurylys kompanııalary júzege asyrǵanyn erekshe maqtan tutamyn. Jańa áýejaı óńirimizdi odan ári damytyp, kórkeıtýge, týrızmniń damýyna qýatty serpin beredi, áýe jolaýshylary aǵynyn arttyrady, jańa halyqaralyq baǵyttarǵa jol ashady dep senemin», dedi Ǵalı Esqalıev.
QPO bas dırektory Djankarlo Rýıý osy mańyzdy jobanyń sátti aıaqtalýy kompanııa men aımaqtyq bılik arasynda qalyptasqan jemisti yntymaqtastyq pen áriptestiktiń nátıjesinde múmkin bolǵanyn atap ótti.
«QPO óńirdegi áleýmettik jobalardy júzege asyrýǵa belsene atsalysyp keledi. Bul rette QPO-nyń óńirdiń áleýmettik ınfraqurylymyn damytýǵa jumsaǵan ınvestısııasynyń jalpy somasy búginde 455 mln dollardan asty. Qazaqstannyń ýákiletti organdarymen yntymaqtastyqty odan ári nyǵaıta beremiz. Respýblıkanyń turaqty damý mindetterin eskere otyryp, oblys turǵyndarynyń múddesi úshin Qarashyǵanaqty ıgerýden barynsha qaıtarymdy qamtamasyz etýge degen ortaq maqsatymyzǵa negizdelgen», dedi Djankarlo Rýıý.
Jańa termınal halyqaralyq standarttarǵa saı ári zamanaýı tehnologııalardy paıdalana otyryp salynǵan. Onyń jolaýshylar aǵynyn ótkizý qabileti saǵatyna 200 jolaýshyǵa eseptelgen, al áýe tasymalynyń jyldyq kólemi 600 myń jolaýshyǵa deıin jetedi.
