«Makrokórsetkishterdiń boljamy syrtqy ekonomıkalyq jaǵdaıdy, álemdik ekonomıkanyń damýyn baǵalaý, sonymen qatar munaı naryǵyndaǵy úrdisterdi eskere otyryp naqtylandy. Máselen, jyl basynan beri el ekonomıkasynyń ósýiniń oń serpini baıqalǵan. Jalpy ishki ónimniń ósý qarqyny qańtar-aqpan aılarynda 3,5%-dy qurady.
Jyl basynan beri munaıdyń ortasha baǵasy barreline 98 AQSh dollar boldy. Bul rette Dúnıejúzilik qarjy uıymdarynyń 2022 jyly munaı baǵasy boıynsha boljamy 74 AQSh dollardan 105 AQSh dollaryna deıin qalyptasýda. Osyǵan baılanysty makrokórsetkishterdi naqtylaý kezinde munaıdyń ortasha jyldyq baǵasy barreline 90 AQSh dollar deńgeıinde aıqyndaldy», dedi T. Jaqsylyqov.
Onyń aıtýynsha, S&P Global Ratings agenttigi 2022 jyly álemdik ekonomıkanyń ósý boljamyn 4,2%-dan 3,6%-ǵa deıin tómendetti. Joǵaryda aıtylǵandardy eskere otyryp, el ekonomıkasynyń ósý boljamy 3,9%-dan 2,1%-ǵa deıin tómendedi.
«Respýblıkalyq bıýdjettiń kirisi 2022 jyly 10,2 trln teńge kóleminde baǵalanady, bul – bekitilgen jospardan 955 mlrd teńgege joǵary kórsetkish. Kirister munaıǵa boljamdy baǵanyń ulǵaıýy jáne AQSh dollaryna teńge baǵamynyń ózgerýi aıasynda baj mólsherlemesiniń artýy esebinen munaıǵa eksporttyq kedendik baj boıynsha, sondaı-aq makroekonomıkalyq kórsetkishterdiń ósýi esebinen korporatıvtik tabys salyǵy boıynsha ulǵaıýy múmkin. Ulttyq qordan kepildendirilgen transferttiń mólsheri 4 030 mlrd teńgege deıin nemese 1 630 mlrd teńgege ulǵaıtylady», dedi Ulttyq ekonomıka mınıstriniń mindetin atqarýshy.
