QR Saýda jáne ıntegrasııa mınıstrligi Saýda komıtetiniń tóraǵasy Erjan Qazanbaevtyń aıtýynsha, ótken aptada áleýmettik mańyzy bar azyq-túlik taýarlary baǵasynyń ósimi - 0,6% boldy. Atap aıtqanda, pııaz - 2,9%, qyryqqabat - 2,8%, qus eti - 2,5%, sábiz - 2,3%, qant - 1,5%-ǵa qymbattady. О́ńirler arasynda baǵanyń eń joǵary ósýi - Nur-Sultan (0,9%) jáne Almaty (0,8%) qalalarynda tirkeldi.
Elimizde saýda ústemesin baqylaý jumystary aıasynda úı mańyndaǵy 32308 dúken tekserildi (qamtý – 77%), sonyń nátıjesinde 358 fakti anyqtalyp, barlyǵyna qatysty tıisti sharalar qabyldandy.
Aýyl sharýashylyǵy mınıstri Erbol Qarashókeevtiń aıtýynsha, búgingi tańda Qazaqstanda azyq-túliktiń (jańa ónimdi eseptemegende 669 841 tonna), onyń ishinde sıyr eti, kartop, un, jumyrtqa, sút jáne basqasynyń edáýir qory qalyptastyrylǵan.
Sondaı-aq, QR Premer-Mınıstri ÁMAT baǵasynyń eń joǵary ósimi tirkelgen Nur-Sultan qalasy ákiminiń orynbasary Erlan Bekmurzaevtyń jáne Almaty qalasy ákiminiń orynbasary Álisher Ábdiqadyrovtyń, sonymen qatar respýblıka boıynsha qyryqqabattyń eń joǵary baǵasy (kelisine 340 teńge) tirkelgen Pavlodar oblysynyń ákimi Ábilqaıyr Sqaqovtyń esepterin tyńdady. Keńesti qorytyndylaı kele, Álıhan Smaıylov baǵany ustap turý máseleleri birinshi kezekte mańyzdy ekenin atap ótti.
«Men birneshe ret «aınalym shemasyn» qarjylandyrýdy arttyrýdy tapsyrdym, alaıda búginde jumys tıisti deńgeıde oryndalmady. Osy aıdyń aıaǵyna deıin qarjylandyrýdy 100 mlrd teńgege deıin ulǵaıtý qajet. Bul kórsetkishti maqsatty deńgeıge jetkizbeıtin óńirlerde ákimderdiń atalǵan salaǵa jetekshilik etetin orynbasarlaryna tıisti shara qoldaný týraly usynystar qaralady», dedi Úkimet basshysy.
Álıhan Smaıylov aldaǵy agrarlyq maýsym qarsańynda óńirlerdiń basty mindeti - kúzgi aýyl sharýashylyǵy ónimderin jetkizýge forvardtyq sharttar jasasý bolýy tıis ekenin atap ótti.
Aýyl sharýashylyǵy mınıstrligine ákimdiktermen birge baǵany ustap turý maqsatynda ónimdi jedel túrde tikeleı jetkizý úshin óndiris pen tutyný teńgerimin turaqty negizde ózektendirip otyrý tapsyryldy. Kún tártibindegi ekinshi másele boıynsha sóz sóılegen densaýlyq saqtaý mınıstri Ajar Ǵınııat «SQ-Farmasııa» JShS medısınalyq tehnıkasyn ortalyqtandyrylǵan satyp alýǵa kóshý Memleket basshysynyń tapsyrmasyna sáıkes júrgizilip jatqanyn eske saldy.
Bıyl jobany pılottyq rejımde iske asyrý josparlanyp otyr, al 2023 jyldan bastap jabdyqtardy jergiliktendirý nemese kelisimsharttyq negizde óndirý boıynsha uzaq merzimdi sharttar jasalady.
Talqylaý qorytyndysy boıynsha Úkimet basshysy beıindi mınıstrlikke ákimdikter kótergen máselelerdi eskere otyryp, ortalyqtandyrylǵan satyp alý tetikterin pysyqtaýdy jáne Úkimetke tıisti usynystar engizýdi tapsyrdy.
