Qoǵam • 26 Sáýir, 2022

Arnaıy ınspektorlar jumysynyń mańyzy zor

Elimizde zorlyq-zombylyqqa qarsy is-qımyl áreketterin jetildirý baǵytynda aýqymdy jumys atqarylyp jatqanyna qaramastan, bul sanattaǵy qylmystar sany azaımaı tur. Bul týraly Ortalyq kommýnıkasııalar qyzmeti alańynda ótken baspasóz máslıhatynda IIM Ákimshilik polısııa komıteti tóraǵasynyń orynbasary Alekseı Mılıýk, IIM Ákimshilik polısııa komıtetiniń basqarma basshysy Áset Ospanov málimdedi.

Tabıǵat MUSYLMANQUL

«Adamdy májbúrleý áreketine qatysty másele nazardan tys qalmaq emes. Qazirgi kezde halyqaralyq zańnamalar tetigi zerdelenip jatyr. Atalǵan zańdardyń bizdiń qoǵamǵa qanshalyqty sáıkes keletini naqtylanýda. Kisige tıisý, májbúrleý áreketine qatysty qylmystyq jaýapkershilik engizý qanshalyqty qajet? Ony qylmystyq kodekske engizý máseleniń sheshilýine qanshalyqty yqpal etedi? Osyndaı máseleler talqyǵa túsýde. Talqylaýǵa sala sarapshylary, psıhologter men zań salasynyń mamandary úles qosyp keledi», dedi Alekseı Mılıýk baspasóz máslıhatynda.

IIM ókili zorlaýǵa qatysty jazanyń qatańdatylǵanyna da toqtaldy. «Zorlyq jasaýshynyń jazasy jeńil bolmaıdy. Búginde atalǵan qylmys boıynsha tatýlasý múmkindigi alynyp tastalǵan. Áńgime balalarǵa qatysty bolsa tipti qatań. Olar qatań jazalanyp, kinási keshirilmeıdi, merziminen buryn bosatylmaıdy», dedi ol máseleniń mánisine úńilip.

IIM Ákimshilik polısııa komıtetiniń basqarma basshysy Áset Ospanov keltirgen málimetterge qaraǵanda, Qazaqstanda zorlyq-zombylyqqa ushyraıtyndardyń 54 paıyzy áıelder eken.

«Turmystyq janjaldardyń týyndaýynyń sebebi ártúrli», deıdi Á.Ospanov. «Elimizde turmystyq zorlyq-zombylyq qurbandarynyń 54 paıyzy – áıelder, qalǵany – er adamdar. Máseleniń kóbi otbasylyq daý-janjaldan týyndap jatady. Turmystyq zorlyq-zombylyq degende tek erli-zaıyptylar arasyndaǵy ózekti máseleler ǵana emes, áke men bala arasyndaǵy kelispeýshilik pen janjal da bar. Sol sekildi baýyrlardyń arasynda da kelispeýshilik týyndaýy múmkin. Osyǵan uqsas jaıttar turmystyq zorlyq, kúsh kórsetýge jatady», deıdi ol.

«Elimizde áıelderdi zorlyq-zombylyqtan qorǵaý maqsatynda arnaıy ınspektorlar jumysyna aıryqsha mán berilip otyr. Prezıdent Ulttyq qoǵamdyq senim keńesiniń otyrysynda atalǵan sala ınspektorlarynyń sanyn kóbeıtý qajet ekenin basa aıtty. Qazirgi kezde ishki rezervter esebinen olardyń sany eki ese artty. Qazir elimizde áıelderdi zorlyq-zombylyqtan qorǵaý salasynda 248 ınspektor jumys isteıdi», dedi Á.Ospanov.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz