Otyrysta Berik Bekjanov elimizde memlekettik tirkeý nómiri joq nemese kólik quralyna jalǵan, qoldan jasalǵan nómirlerdi paıdalaný arqyly kólik júrgizý faktileri keń etek alǵanyna nazar aýdardy.
«Memleket basshysy Qasym-Jomart Toqaev kólik nómirin qoldan jasaý nemese jalǵan nómir paıdalaný boıynsha jaýapkershilikti kúsheıtýdi tapsyrdy. Biz, eń aldymen, halyqtyń talap-tilegin oryndap, osyndaı buzaqylyqpen kúresýimiz kerek. Búgingi tańda mundaı zań buzýshylyqtarǵa Ákimshilik quqyq buzýshylyqtar týraly jáne Qylmystyq kodeksterde birqatar jaza qarastyrylǵan. Alaıda jaýapkershiliktiń jumsaqtyǵy halyq arasynda alańdatýshylyq týǵyzyp otyr. Osyǵan oraı qazirgi tańda Májiliste osy zań jobalaryndaǵy normalar qaıta qaralyp, jaýapkershilik kúsheıtilýde. О́ıtkeni zańsyz nómirmen nemese múldem nómirsiz kólik júrgizý aýyr qylmys jasaýǵa aparýy múmkin», dedi Májilis depýtaty.
Memleket basshysy Qasym-Jomart Toqaev Joldaýda zań ústemdigin ornatýǵa basa nazar aýdardy. Osy oraıda depýtattar quqyq qorǵaý organdarynyń qyzmetin jetildirýge jáne jol-kólik oqıǵalaryn aldyn alý úshin zańdy qatańdatýǵa erekshe mán berýde.
Atap aıtsaq, Ákimshilik quqyq buzýshylyqtar týraly kodekste zańsyz memlekettik tirkeý nómirin qoldanǵandarǵa bes aılyq eseptik kórsetkishten (15 315 tg) tórt júz (1 225 200 tg) aılyq eseptik kórsetkish mólsherinde aıyppul salynady.
Qylmystyq kodekste kólik nómirin qoldan jasaý nemese jalǵan nómir paıdalanýǵa eki myń aılyq eseptik kórsetkishke (6 126 000 tg) deıingi mólsherde aıyppul salý nemese eki jylǵa deıin bas bostandyǵyn shekteý qarastyrylǵan.
Aıta ketý kerek, Bas prokýratýranyń málimetine sáıkes, atalǵan faktiler boıynsha 2022 jyldyń birinshi toqsanynda 73 124 quqyq buzýshylyq tirkelse, 72 628 fakti boıynsha ákimshilik aıyppul salynyp, 16 kólik ıesi júrgizýshi kýáliginen aıyrylǵan.
