Árbir halyqtyń jan dúnıesi onyń kúlki-syqaq, ázil-ospaǵynan da kórinedi. Belgili bir halyqtyń satıra-ıýmorynda onyń búkil tarıhy, kúres joly, ár dáýirdegi kóńil kúıi kórinis tabady. San qyrly satıra-ıýmorynan sol eldiń bolmys-bitimin, turmys-tirshiligin, eń aıaǵy, qaı qoǵam qandaı dárejede ǵumyr keship jatqanyn da baǵamdaýǵa bolady. 1976 jyly satırık-dramatýrg Qaltaı Muhamedjanov túriktiń ǵajap syqaqshysy Ázız Nesınmen orystyń belgili akteri Arkadıı Raıkınniń óner keshine barady. Qalaǵań shyǵarmashylyq keshti kórip otyrǵan Ázız Nesınnen beı-jaılyǵyn suraǵanda: «Árıne, Raıkınniń jaqsy-aq akter, biraq ár qoǵamdaǵy ár halyqtyń kúlkisiniń óz nysany, maqsaty, áshkere eter kesel-kesiri bolady. Bizdegi qoǵamnyń nysanasy basqa, osy turǵydan alsaq, sizderdegideı maıda-shúıdege kúletin dárejege biz áli jetken joqpyz» depti.
Ár eldiń satıra-ıýmory sol halyqtyń turmys-tirshiligine, bolmysyna oraı jazylyp, soǵan saı óz maqsat-múdde óresinen tabylatyny sózsiz. Al túrik satırasynyń darabozy Ázız Nesınniń de shyǵarmalary bizdiń qoǵammen úndesip, onyń ýytty satırasynyń qazaq oqyrmanynyń talǵam-talap údesinen shyǵyp jatýy qýantady. Túrik áziliniń bizge aýdarma arqyly jetip jatýy da quptarlyq dúnıe. Ázız Nesındi buǵan deıin qazaq satırıkteri aýdaryp kelgeni belgili. Al qalyń oqyrmanǵa usynylyp otyrǵan jınaqta onyń tyń shyǵarmalarynyń aýdarylyp berilýi quptarlyq nárse.
Negizinde jınaq orys satırık-ıýmorısteriniń týyndylaryn kóbirek qamtyǵan. Erterektegi klassık Mıhaıl Zoshenkodan tartyp, orys satırık-jazýshylarynyń betke ustarlary Mıhaıl Jvaneskıı, Mıhaıl Zadornov, Lıon Izmaılov bastaǵan Arkadıı Arkanov, Vıktor Koklıýshkın, Arkadıı Inın, German Drobız, Pavel Ass, Semen Altov, Leonıd Fransýzov, Evgenıı Golýbev, Anatolıı Týshkın, Lev Laıner, Iýrıı Ishenko, Aleksandr Hort sııaqty basqa da satıra sardarlary shyǵarmalarynyń jınaqqa enýi kitaptyń mazmunyn asha túsip, qalyń oqyrmannyń qyzyǵýshylyǵyn arttyrady. Jınaqtaǵy áńgimelerdi oqyp otyryp qoǵam qaıshylyqtaryn shenegen tapqyr taqyryptarǵa, oǵash oqıǵaǵa oraı qurylǵan sýrettemedegi pende bolmysyndaǵy uqsastyqtarǵa rıza bolasyń. Áńgimelerdegi kereǵar qylyqtar bizdiń de bolmysymyzǵa jat emes.
Osy týyndylardy aýdarǵan satırık Berik Sadyrdyń kórkem ádebıettiń satıra-ıýmor janryna úzbeı atsalysyp kele jatqanyna qyryq jyldan asty. Usynyp otyrǵan «Álem ázil áńgimeleri» atty jınaqqa bir kezderi baspasóz betterinde jarııalanǵan aýdarmalarynyń ózin suryptap toptastyrypty. Qazaq satırasynyń beldi ókiliniń talǵamynan shyqqan shetel ázil áńgimeleriniń aýdarmasy ádebıetimizge qosylǵan soqtaly dúnıe bolyp, qalyń oqyrman qaýym rızashylyǵyna bóleneri sózsiz.
Qaı áńgimeni alsańyz da qysqa-nusqalyǵymen erekshelenedi. Jaryq kórgen osy jınaqtan oqyrman baqandaı 352 shaǵyn áńgime oqı alady. Al sonshama áńgimeni oqı otyryp qaıtalanǵan taqyryp, pishindes mazmundaǵy qos áńgimeni kezdestire almaısyz. Bunyń ózin avtordyń kitap qurastyrýdaǵy asa jaýapkershiligi dep bilemiz.
Avtor áńgimelerdi aýdarý barysynda oqıǵa jelisinen aýytqymaı, tek keı tirkes-tirkemelerdi óz oqyrmandarymyzdyń talǵamyna saı berýi quptarlyq ádis-tásil. Oqıǵa baıandaýda artyq-aýys tustar joqtyń qasy. Til kestesi de ornyqty, kópshilikke etene jaqyn qarapaıym da kórkem tilmen órnektep shyqqan.
«Egemen-aqparat»
