«Ishki ekonomıkadaǵy jaǵdaı oń bolyp otyr. Bıyl birinshi toqsanda jalpy ishki ónim 4,4%-ǵa ósti. Ekonomıkanyń 2021 jyly 4%-ǵa artyp, pandemııaǵa deıingi deńgeıge oralǵanyn atap ótken jón. 2022 jylǵy naýryzda taýar aınalymynyń ósýi jyldyq mánde 3,7%-ǵa deıin jedeldedi», dedi QR Ulttyq bank tóraǵasy.
Onyń málimdeýinshe, Qazaqstanda tutyný kóleminiń ósýi ınflıasııaǵa qysym kórsetip otyr. Inflıasııa osy jylǵy sáýirde 13,2%-ǵa deıin jedeldedi. Ásirese azyq-túlik taýarlarynyń baǵasy qatty ósip, 17,9%-ǵa artty. Azyq-túlikke jatpaıtyn taýarlar baǵasynyń ósimi 11,1%-ǵa, aqyly qyzmetter baǵasynyń ósimi 8,9%-ǵa deıin jedeldedi.
«Proınflıasııalyq qysymnyń ósýinen Ulttyq bank dezınflıasııalyq aqsha-kredıt saıasatyn júrgizip keledi. 2022 jylǵy 24 aqpanda Ulttyq bank geosaıası jaǵdaıdyń nasharlaýyna baılanysty qarjylyq jáne makroekonomıkalyq turaqtylyqty qamtamasyz etý úshin bazalyq stavkany 13,5%-ǵa deıin kóterdi. Bazalyq mólsherleme kóterilgen soń, aqpanda halyqtyń teńgedegi salymdary boıynsha Qazaqstannyń depozıtterge kepildik berý qory usynatyn shekti stavkalar da kóterildi», dedi Ulttyq Bank tóraǵasy.
Sonymen qosa, Úkimetpen birlesip jeke tulǵalardyń teńgedegi depozıtteri boıynsha respýblıkalyq bıýdjet esebinen ótemaqy tóleýdi kózdeıtin Teńgedegi salymdardy qorǵaý baǵdarlamasyn jarııalady.
«Ulttyq Bank 25 sáýirde ekonomıkanyń, ishki jáne syrtqy suranystyń oń serpini kezinde jalǵasyp otyrǵan fıskaldyq yntalandyrý aıasynda bazalyq stavkany 14%-ǵa deıin kóterdi. Inflıasııaǵa qarsy saıasatty kúsheıtý úshin Úkimet Ulttyq bankpen birlesip, bıylǵy aqpannan bastap 2022-2024 jyldarǵa arnalǵan Inflıasııany baqylaý jáne tómendetý jónindegi jańartylǵan sharalar keshenin iske asyrýda», deıdi Pirmatov.
