Aýdan ortalyǵynyń ortalyq ıppodromynda aqshańqy kıiz úıler tigilip, qazan kóterildi. Burq-sarq samaýyr qaınady...
Sáıgúlikterdiń biri qara úze shapsa, endi biri shań qapty. Quıryq tistese kelgenderi de boldy. Júzden júırikteri máre syzyǵyn birinshi qıyp, bapkerleri men at ıeleri bórikterin aspanǵa atty.
Balýandardyń beldesýi de tartysty ótti. Jaýyryny jerge tımegen Azat Smaǵulov túıe balýan atansa, Rahat Narımanov ekinshi oryn aldy. Úshinshi oryndy Serikbol Qabdıev qanaǵat tutty.
Eki jylǵy shekteý sharalarynan soń halyq áı bir serpilip qaldy ǵoı deımin. «Aǵaıynnyń aty ozǵansha, aýyldastyń taıy ozsyn» dep báıgege shapqandarǵa taqym qysty, beldeskenderge qıqý qosty.
Taqymy myqty, bilegi qarýly jigitter aýdaryspaqqa shyqty. At-matymen julyp alǵan bilektilerdi de kórdik.
Aýdan ákiminiń júldesine uıymdastyrylyp jatqan alamanǵa avtokólik jáne aqshalaı syılyqtar tigilgen. Taı jarys, ushqyr báıge, jorǵa syndy saıysqa qatysqan júldegerler de baǵaly syılyqtarǵa ıe boldy.
100 shaqyrymdyq alamanda oq boıy ozyp kelgen Rýslan Shaıyrǵazınniń jıren qasqasy edi. Sóıtip, avtokólik Samardan kelgen atbeginiń enshisinde ketti. Shyǵys Qazaqstan oblysy Katonqaraǵaı aýdany
