Referendým-2022 • 13 Mamyr, 2022

Tarıhı sheshimdi birlesip qabyldaýǵa shaqyrdy

Qazaqstan halqy úshin mańyzy zor saıası naýqannyń túpki máni nede? Referendým nátıjesinde Konstıtýsııaǵa qandaı eleýli ózgerister enedi? Ortalyq kommýnıkasııalar qyzmeti alańynda ótken baspasóz máslıhatynda Ádilet vıse-mınıstri Alma Muqanova osy saýaldarǵa jaýap berdi.

Tabıǵat MUSYLMANQUL

Kollajdy jasaǵan Záýresh Smaǵul, «EQ»

«5 maýsym kúni ótetin búkilhalyqtyq referendýmǵa shyǵarylyp jatqan konstıtýsııalyq ózgeristerdiń ishinde Prezıdenttiń ókilettigine qatysty shekteýler jurtshylyq tarapynan úlken qyzyǵýshylyq týdyryp otyrǵany barshamyzǵa belgili. Halyq osy máseleni keńinen bilgisi keletini aıtpasa da túsinikti ǵoı. Buǵan deıin aıtylǵandaı, aldaǵy ýaqytta Prezıdenttiń jaqyn týystary úshin saıası laýazymdar men kvazımemlekettik sektorda basshylyq laýazymdardy atqarýǵa shekteý qoıylady. Sonymen qatar Prezıdenttiń óz ókilettikterin júzege asyrý kezeńinde saıası partııa múshesi bolýyna tyıym salynatyny buǵan deıin de habarlanǵan bolatyn. Osy ózgeristerdiń mańyzy zor ekeni ras», dedi Alma Muqanova.

Vıse-mınıstr keltirgen derekterge zer salsaq, Ata Zańymyzǵa enetin ózgerister legi 12 bloktan turady. Memleketimizdi demokratııalandyrý úrdisinde atalmysh baǵyttyń árqaısysynyń ózindik mańyzy zor bolmaq. Qazaqstan halqy osy máselege de aıryqsha nazar aýdarǵany lázim.

«Aldaǵy ýaqytta Prezıdentten ákimderdi saılaý jáne bosatý quqyǵy alynyp tastalady. Bul Prezıdent ókilettiginiń qysqaratyndyǵynyń aıqyn kórinisi ekeni daýsyz. Qysqasy, osy ózgerister sýperprezıdenttik basqarý úlgisinen bas tartýdyń jarqyn úlgisi bolmaq», dedi A.Muqanova.

Búkilhalyqtyq sıpatqa ıe bolatyn referendýmnyń nátıjesinde 17 óńirdiń 11-i jaqtap daýys berse, Konstıtýsııaǵa josparlanǵan ózgerister engiziledi. Búgingi tańda elektorattyń tizimi jasaqtalyp jatyr. Vıse-mınıstrdiń sózine sensek, referendým arqyly Konstıtýsııaǵa barlyǵy 56 ózgeris engiziledi.

«5 maýsym kúni ótetin referendým nátıjesi oıdaǵydaı bolsa, Konstıtýsııaǵa barlyǵy 56 ózgeris engiziledi. О́zgeristerdiń barlyǵyn jeke-jeke saralaý úshin ár adamǵa 56 bıýlleten kerek bolady. Ony tolyqqandy oqyp shyǵýdyń qıyn ekeni de ras. Sol sebepti de bıýlletende bir ǵana saýal bolady. О́ıtkeni Konstıtýsııaǵa engiziletin ózgerister bir-birimen tyǵyz baılanysty ekenin kórip otyrsyzdar. Sondyqtan osyndaı nusqa tańdalynyp otyr», dedi mınıstrlik ókili.

Baspasóz máslıhaty barysynda Ádilet vıse-mınıstri Alma Muqanova Qazaqstan halqyn búkilhalyqtyq referendýmǵa belsendilikpen qatysýǵa, memlekettiń keleshegi aıqyndalatyn sheshimdi birlesip qabyldaýǵa shaqyrdy. Sondaı-aq ol óz sózinde demokratııalyq úrdisterdiń jańa sıpaty kórinis tabatyn saıası naýqannyń mańyzyn árbir azamat túsinýi keregin atap ótti.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz