Hokkeı • 16 Mamyr, 2022

Shabýylshy azýsyz, qorǵaýshy qaýqarsyz bolsa...

21 ret kórsetildi

Fınlıandııa astanasy – Helsınkıde shaıbaly hokkeıden 85-shi álem chempıonatynyń jalaýy jelbiredi. Sýomı eliniń Tampere men Helsınkı qalalarynda uıymdastyrylyp jatqan dúnıejúzilik dodaǵa tórtkúl dúnıeniń eń úzdik degen 16 komandasy qatysyp jatyr. Olardyń qatarynda Qazaqstan ulttyq quramasynyń jigitteri de bar.

Qazaqstandyq hokkeıshiler elıtaly dıvızıonnyń álem chempıonatyna qatysý quqyǵyn 2019 jyly elordada ótken birinshi dıvı­zıonnyń chempıonatynda je­ńip alǵan bolatyn. Sodan beri, mine, bıyl qatarynan ekinshi jyl joǵary toptyń dodasyna qaty­syp jatyr. Tórtjyldyq úzi­listen keıin (Qazaqstan eń sońǵy ret 2016 jyly Reseıdegi álem chempıo­natyna qatysqan) byltyr Latvııadaǵy birinshilikte óner kór­setken hokkeıshilerimiz jalpy esepte 10-orynǵa taban tirep, 10-shy márte elıtaly dıvızıonnyń álem chempıonatyna qatysý múm­kindigin saqtap qaldy.

Iýrıı Mıhaılıs shákirtteri bıylǵy baıraqty básekede táýir óner kórsetý úshin muz ústindegi daıyndyqtaryn erte bastaǵan-dy. Alǵashqy oqý-jattyǵý jıynyn elordada ótkizip, keıinnen ekinshi bóligin Latvııada jalǵastyrdy. Rıga­daǵy daıyndyq aıasynda jer­gilikti hokkeıshilermen eki márte joldastyq match oınap, ekeýinde de iri eseppen jeńilip qaldy. Eń óki­nishtisi, sol oıyndarda ulttyq quramanyń negizgi hokkeıshileri Evgenıı Rymarev (shabýylshy) pen Ivan Stepanenko (qorǵaýshy) qarsylas komandalardyń oıynshylarymen soqtyǵysyp, aýyr jaraqat alyp qaldy. Saldarynan ekeýi de álem chempıonatyna qa­tysa almaıtyn boldy. Sondaı-aq byl­tyrǵy dodada juldyzy jan­ǵan qaqpashy Nıkıta Boıarkın de ja­raqatyna baılanysty quramaǵa kó­mektese almaıtyny áýelden bel­­gili edi. Sońǵysynyń quramada joq­­ty­ǵy alǵashqy oıynda qatty bilindi.

Degenmen jyl ótken saıyn ulttyq quramada qazaq jigitteriniń qatary artyp kele jatqany kóz qýan­tady. Buǵan deıingi dúnıe­júzilik birinshilikterde eń kóp degende bir ǵana qandasymyz óner kór­setse, bıyl olardyń sany tór­teýge jetti. Atap aıtqanda, Saıan jáne Samat Danııar, Álıhan Ásetov pen Ádil Beketaev. Keshegi Danııamen ótken alǵashqy oıynda qorǵaýshy Samat Danııar Qazaqstan quramasy sapyndaǵy matchtyń eń úzdik oıynshysy dep tanyldy.

Jerlesterimiz Fınlıandııadaǵy tusaýkeser kezdesýin Helsınkıdegi «Muz saraıy» sport kesheninde Beıjiń Olımpıadasynyń pleı-off kezeńine deıin jetken Danııa quramasymen ótkizip, iri eseppen jol berdi – 1:9. Bizdiń jigitter osy chem­pıonatqa daıyndyq ba­ry­­synda, joǵaryda aıtyp ót­ke­nimizdeı, nebári eki-aq baqylaý matchyn ótkizse, danııalyq hokkeı­shiler segiz joldastyq kezdesýde muzaıdynǵa shyqqan. Danııa quramasy alǵashqy tórt oıynda Fınlıandııa men Shvesııadan eki márteden jeńilse, keıinnen Nor­vegııa quramasynan bir oıyn­da uty­lyp, ekinshisinde basym túsken. Al sońǵy eki kezdesýinde Uly­rı­tanııa hok­keıshilerinen aılasyn asyr­ǵan.

Osylaısha, fınlıandııaǵa óte joǵary daıyndyqpen kelgen Danııa quramasy Qazaqstanmen ótken matchtyń taǵdyryn alǵashqy bes mı­nýttyń ishinde-aq sheship tastady. Segiz myń jankúıerge shaqtap salynǵan «Muz saraıyndaǵy» kezdesýdiń esebi 3-mınýtta ashyldy. Shaıba avtory – Patrık Borkstrand. Keıingi eki mınýtta Felıks Sheel men Ioakım Blık­feld mergendigimen kózge túsip, tab­lodaǵy kórsetkishti – 3:0-ge jet­kizdi. Úsh goldan keıin es jııý qıyn bolsa da, qazaqstandyq hok­keı­shiler birte-birte oıyn tiz­ginin óz qoldaryna ala bastady. Tipti qarsylas qaqpanyń ma­ńaıyn­da birneshe qaýipti shabýyl uıym­dastyrǵanymen, gol soǵa almady.

Ekinshi kezeńdi de danııalyqtar sátti bastap, qaqpamyzǵa jaýapsyz taǵy da tórt shaıba soqty. Gol­dyń avtorlary – Frederık Shtorm (23-mınýt), Iýlıan Iаkob­sen (27), Ioakım Blıkfeld (30) jáne Olıver Larsen (40). Iýrıı Mıhaılıs qarsylastar besinshi shaı­basyn soqqannan keıin qaq-p­ashy Andreı Shýtovtyń ornyna Ilıa Rýmıansevti shyǵardy. Alaı­da Qazaqstan quramasyn «Ar­lan­nyń» qaqpashysy da iri jeńi­lis­ten qutqaryp qala almady. I.Rý­­mıan­sev te match sońyna deıin óz qaq­­pasyna tórt shaıba ótkizip aldy.

Úshinshi kezeń bastala sala Peter Regın (41) komandasynyń segi­zinshi shaıbasyn salsa, arada 10 mınýt ótkende Ioakım Blıkfeld het-trık jasap, óz komandasy sha­býylynyń núktesin qoıdy. Tek kezdesý sońyna qaraı, ıaǵnı 59-mınýtta Kırıll Savıskıı Qazaqstan quramasynyń osy matchtaǵy jáne týrnırdegi alǵashqy golyn soqty. Match barysynda Valerıı Orehov, Kertıs Volk pen Egor Petýhov jáne Álıhan Áse­tovterde esepti qys­­qartýǵa tamasha múmkindik bol­ǵan edi. Alaıda jerlesterimiz onyń birde-bireýin júzege asyra almady.

Qazaqstan men Danııa qurama­lary eń keıingi ret 2016 jyly Reseıde ótken álem chempıonatyn­da muzaıdynda kezdesip, sol kezde de danııalyqtar myqtylyq tanytqan edi – 4.1.

Qazaqstandy iri eseppen qapy qaldyrǵan Danııa quramasy «A» tobynda kósh bastady. Alǵashqy týrda Italııany 5:2 esebimen jeń­­gen Shveısarııa ekinshi, al Ger­­manııany 5:3 esebimen utqan Kana­da quramasy ázirshe úshinshi orynǵa jaıǵasty. Birinshi týrda Germanııadan jeńilip (1:2), ekinshi týrda Fransııany 4:2 esebimen qapy qaldyrǵan Slovakııa týrnır kestesinde tórtinshi orynda, bir jeńisi bar Germanııa besinshi satyda tur. Chempıonatty sátsiz bastaǵan Fransııa, Italııa jáne Qazaqstan quramalary sońǵy oryn­darǵa turaqtaǵan.

«B» tobynda alǵashqy eki kún­niń qorytyndysy boıynsha, jarys qojaıyndary alty upaımen týrnır kestesinde jeke-dara kósh bastady. Fınlıandııa alǵashqy týrda Latvııany (2:1), ekinshi týrda Nor­vegııany (5:0) jeńdi. Keıingi oryn­dardy bir-birden jeńisi bar Chehııa (Ulybrıtanııa – 5:1), AQSh (Latvııa – 5:1) jáne Shvesııa (Aýs­trııa – 3:1) quramalary ózara bólisip tur.

Qazaqstan quramasy keshe keshkisin ekinshi oıynyn Fran­sııamen ótkizdi.

Sońǵy jańalyqtar

Dollar arzandady

Ekonomıka • Búgin, 16:52

Qosshyda jańa mektep ashylady

Bilim • Búgin, 16:25

Almatyda esirtki tasymalynyń joly kesildi

Aımaqtar • Búgin, 14:55

Hamenova óz kinásin moıyndaǵan joq

Qoǵam • Búgin, 14:16

Qazaqstanda jylqy eti qymbattady

Qoǵam • Búgin, 14:02

Pavlodarda joǵalǵan ana men bala tabyldy

Aımaqtar • Búgin, 11:40

Uqsas jańalyqtar