Osyǵan baılanysty Parlament Májilisiniń depýtattary Dúısenbaı Turǵanov, Sálimjan Naqpaev pen Nurlybek Ojaev «Atyraý jylý-elektr ortalyǵy» aksıonerlik qoǵamynyń ujymymen kezdesti. Qaı óńir bolmasyn, mundaı kásiporyndar erekshelenip turady. О́ıtkeni turǵyndardy jaryq pen jylýdan taryqtyrmaý úshin strategııalyq mańyzy aıryqsha kásiporynda mańdaı terin tóge eńbek etip júrgen jumysshylar referendým sekildi mańyzdy is-sharaǵa qatysýdan tys qalmaýy qajet. Sol sebepten depýtattar el Konstıtýsııasynyń 33 babyna engizilgeli otyrǵan ózgerister men tolyqtyrýlardyń mańyzyn tarqata aıtyp, jumysshylar tarapynan qoıylǵan saýaldarǵa jaýap berdi.
– Prezıdent Qasym-Jomart Toqaevtyń bastamasymen elimizde Jańa Qazaqstandy qurý maqsatyndaǵy saıası jańǵyrý qadamdary bastaldy. Bul – táýelsiz Qazaqstandy jańa baǵytta órkendetýge bastaıtyn úlken ózgeris. Sondyqtan memlekettik bılik tarmaqtaryn bir qolǵa shoǵyrlandyrmaı, ony ártaraptandyrý, sýperprezıdenttik basqarý júıesinen alshaqtap, parlamenttik-prezıdenttik júıege kóshý kózdelip otyr. Árıne, mundaı saıası qadamdy iske asyrýdy batyl júrgizý úshin aldymen quqyqtyq negizin zańdastyrý qajet. Demek el Konstıtýsııasyna ózgerister men tolyqtyrýlar engizý qajettigi týyndady, – deıdi Sálimjan Naqpaev.
Álemdik naryqta bir barreli dollarmen baǵalanǵan «qara altynnyń» ústinde otyrǵan óńir turǵyndaryn áli de tolǵandyratyn, tipti túıinin tez tarqatýdy qajet etetin jaıttar az emes. Tolǵaýy toqsan tirshiliktegi sondaı túıindi máseleniń birqatary Májilis depýtaty Dúısenbaı Turǵanovtyń óńir turǵyndarymen júzdesýinde keńinen talqyǵa tústi. Máselen, Atyraý qalasynyń irgesindegi Aqsaı eldi mekeninde turatyn qandastardy qadaý-qadaý máseleler tolǵandyryp otyr. Sonyń qatarynda áıelderdiń zeınet jasyn tómendetý, múgedekterge beriletin járdemaqyny arttyrý máselesi bar. О́ıtkeni azyq-túlik baǵasynyń qymbattaýy járdemaqy alatyn múmkindigi shekteýli jandardyń janyna batyp-aq otyr.
Atalǵan aýylǵa qońsy qonǵan Qaıyrshaqty eldi mekeniniń turǵyny Edige Sabýrovtyń pikirinshe, qazaq qoǵamy da órkenıetti elderdegideı órkendeýge bastaıtyn ózgeristerdi qalaıtyny daýsyz. «Sol sebepten referendýmǵa qatysý – ár qazaqstandyqtyń mindeti. Biraq bolashaqta jańaratyn Konstıtýsııany tarıh oqýlyǵyna aınaldyrýdyń qajeti joq», deıdi ol.
Al Maqat aýdanyndaǵy Dossor kentiniń turǵyndary Ryspaı Ǵabdıev atyndaǵy balalar óner mektebiniń qazirgi ahýalyna alańdaıdy. Balalardy saz áleminiń sıqyryna baýlıtyn bilim ordasy burynǵy eski aýrýhananyń ǵımaratynda ornalasqan. Mekteptiń materıaldyq-tehnıkalyq bazasy syn kótermeıdi.
Dúısenbaı Turǵanovtyń aıtýynsha, elimizdi úlken ózgeris kútip tur. Qoǵamdy da, sanany da ózgertýdi qalaǵan ár turǵyn referendým arqyly tańdaýyn jasaýy qajet. О́ıtkeni Konstıtýsııaǵa engiziletin túzetýlerdiń negizgi tarmaqtarynda sýperprezıdenttik modelden bas tartý, Tuńǵysh Prezıdent týraly zańnyń kúshin joıý, depýtattardy tańdaýdyń jańa tetigi sekildi mańyzdy ózgerister bar.
– Konstıtýsııalyq Keńeske sot mártebesi qaıtarylyp beriledi. Sol sebepten bul organ azamattardyń máselelerin sheshýdiń sońǵy satysy retinde jumys isteıdi. Elimizde ólim jazasy alynyp tastaldy. Tabıǵat qubylystarynan, ne tehnogendik sıpattaǵy tótenshe jaǵdaılardy joıýǵa qarajat jedel bólinedi. Bul zardaptardy jedel joıý baǵytyndaǵy jumysty júrgizýge múmkindik beredi, – deıdi D.Turǵanov.
Májilis depýtaty Nurlybek Ojaev «Azamattarǵa arnalǵan úkimet» memlekettik korporasııasy» KeAQ-nyń oblystyq fılıalynda kezdesý ótkizdi. Qazir turǵyndardyń deni túrli anyqtamany alý úshin burynǵydaı mekemelerdi jaǵalap júrmeı, halyqqa qyzmet kórsetý ortalyǵyna keledi. Sondyqtan ortalyq qyzmetkerlerine úlken jaýapkershilik júktelip otyr. Alaıda turǵyndarǵa qaltqysyz qyzmet kórsetetin fılıal qyzmetkerlerin alańdatatyn túıtkildi máseleler bar. Birinshiden, ortalyq qyzmetkerleriniń mártebesi naqtylanbaı keledi. Osy sebepten turǵyn úı kezegine tura almaıdy. Ekinshiden, olar memlekettik tildiń qoldaný aıasynyń keńeıtilgenin qalaıdy.
– Konstıtýsııa eki jolmen ǵana ózgeredi. Onyń biri – referendým arqyly, endi biri – Parlament arqyly. Buǵan deıin Ata Zańymyzǵa Parlament arqyly tórt ret ózgeris engizilgen edi. Bul jolǵy ózgeristiń máni de, jóni de bólek. О́ıtkeni Ata Zańǵa engiziletin ózgerister men tolyqtyrýlar halyq talqysyna shyǵarylyp otyr. Referendýmda Konstıtýsııanyń 33 babyna 56 túzetý engizilmek, – dedi Nurlybek Ojaev.
Atyraý oblysy
