Almaty qalasy metropolıteniniń «Baýyrjan Momyshuly» jáne «Sary Arqa» jańa stansııalarynda toǵyz arnaly sıfrly aspapty-ólsheý júıeleri ornatyldy. Atalǵan qurylǵylar shveısarııalyq «GeoSIG» fırmasynyń ónimi.
Bul – Almaty qalasynyń metro júıesinde ornatylǵan alǵashqy seısmıkalyq stansııa. Atalǵan qurylǵylar jer silkinisin aldyn-ala boljaýǵa múmkindik berip, zilzala kezindegi kınematıkalyq parametrlerdiń aspaptyq jazbalaryn alýǵa septigin tıgizbek. Qurylǵydan alynǵan aqparat seısmıkalyq áserdiń naqty qýaty men erekshelikterin eskerýge jáne metropolıtenniń jańa stansııalaryn jobalaýǵa yqpal etedi.
Qurylǵylar kútý rejıminde jumys isteıdi. Onyń iske qosý shegi - 0.05g. Aspapta iske qosý sheginiń bolýy - metropolıtendegi poıyzdar qozǵalysynyń dınamıkalyq áserimen baılanysty.
Stansııalar ótken jyly tehnıkalyq turǵydan iske qosyldy. Bıyl maýsym aıynda olardy tolyǵymen paıdalaný josparlanyp otyr. Aldaǵy ýaqytta metropolıtendegi qurylysy júrip jatqan taǵy eki bekette osy syndy seısmıkalyq stansııalardy ornatý kózdelgen.
