Hadısha Bókeeva atyndaǵy Batys Qazaqstan oblystyq qazaq drama teatrynda ótken «DALA – keýde» atty shyǵarmashylyq keshte jas aqynnyń «Shiderli sher» atty jańa kitabynyń tusaýy kesildi. Aqyn buǵan deıin «О́zimniń aspanymnyń astyndamyn» jáne «Táńirge hat» atty jyr jınaqtaryn oqyrman qaýymǵa usynǵan bolatyn.
Osy keshte Batys Qazaqstan oblystyq halyq shyǵarmashylyǵy ortalyǵy jarııalaǵan «Shiderli sher» atty jas aqyndar músháırasynyń da qorytyndy nátıjesi shyqty. Jyr báıgesine 12 aqyn qatysty. Qaztalov aýdanynan óleń qosqan jas aqyn Abzal Esenǵazy bas júldege ıe bolsa, terektilik qos aqyn: Ádilet Orynbasaruly – birinshi júldeni, Aqtilek Álibekuly – ekinshi oryndy jeńip aldy. Taıpaqtan shyqqan taǵy bir jas aqyn Abylaıhan Maqsutov úshinshi oryn júldesin ıelendi. Jeńimpazdardyń barlyǵyna aqshalaı syılyq berildi.
Ádebı keshte sahnaǵa shyǵyp sóz sóılegen Batys Qazaqstan oblysy ákiminiń orynbasary Baqytjan Narymbetov oblys basshysynyń alǵys hatyn usynyp, aqynnyń óleńin oqyp berdi.
Aq Jaıyqtaǵy ádebıet toıyna Semeı qalasynan arnaıy kelgen aqyn Tynyshtyqbek Ábdikákimuly men aqynnyń jary, Semeı joǵary pedagogıkalyq kolledjiniń dırektory, fılologııa ǵylymdarynyń kandıdaty Shaǵangúl Janaeva batysqazaqstandyqtardyń sóz ónerine yqylasyn, jergilikti basshylardyń qalamgerlerge qoldaýyn erekshe aıtyp ótti. Jazýshy Qýandyq Túmenbaı da kesh ıesiniń shyǵarmashylyǵyna jyly pikir bildirip, altyn qalam tartý etti.
Ǵarıfolla Qurmanǵalıev atyndaǵy oblystyq fılarmonııa zalynda aqyn Tynyshtyqbek Ábdikákimuly men ǵalym Shaǵangúl Janaeva Jahansha Dosmuhameduly atyndaǵy joǵary pedagogıkalyq kolledj ujymymen, stýdentterimen erekshe jyly kezdesý ótkizdi. Jıyn barysynda Semeıdegi pedkolledj ben Oraldaǵy pedkolledj arasynda áriptestik memorandýmǵa qol qoıyldy. Bul kelisim boıynsha Oral jáne Semeı qalasy arasynda stýdent almasý, oqytýshylar almasý, áriptestik qarym-qatynas jolǵa qoıylmaq.
Batys Qazaqstan
