Is-shara barysynda Túrkııanyń TAV Airports Holding kompanııasynyń bas dırektory Serkan Kaptan, holdıngtiń dırektorlar keńesi tóraǵasynyń orynbasary Sanı Shener jáne Almaty halyqaralyq áýejaıynyń prezıdenti Ersoı Alp Er Týnga Qasym-Jomart Toqaevqa ınvestısııalyq joba týraly málimet berdi.
Budan keıin Prezıdent áýejaıdyń jańa halyqaralyq termınalynyń qurylysyn bastaýǵa ruqsat berdi.
Memleket basshysy Almaty áýejaıy elimiz úshin mańyzdy strategııalyq nysan jáne Qazaqstannyń áýe qaqpasy ekenin atap ótti.
«Jańa termınal salynǵannan keıin áýejaıda jylyna 14 mıllıon jolaýshyǵa deıin qyzmet kórsetiletin bolady, ıaǵnı eki esege artady degen sóz. Jańa termınal eń ozyq tehnologııamen jabdyqtalyp, halyqaralyq standarttarǵa saı bolýy kerek. Eń bastysy barlyq jumysty ýaqytynda aıaqtaý qajet», dedi Prezıdent.
Qurylysqa salynǵan ınvestısııanyń jalpy kólemi 200 mıllıon dollardan asady. Jańa termınal tek halyqaralyq baǵyttaǵy reısterge, al qazirgisi ishki reısterge qyzmet kórsetedi. Qurylys 2024 jyly jazda aıaqtalady dep josparlanǵan.
