Palata Konstıtýsııaǵa engiziletin túzetýlerdi shaǵyn jáne orta bıznes sýbektileri arasynda jan-jaqty túsindirý úshin arnaıy jospar ázirlepti.
Ulttyq kásipkerler palatasynyń tóralqa tóraǵasy Raıymbek Batalovtyń aıtýynsha, túzilgen jospar aıasynda saýda jáne oıyn-saýyq ortalyqtarynda, dúkenderde, basqa da shaǵyn jáne orta bıznes nysandarynda túrli kezdesýler uıymdastyrylǵan. Budan bólek, Kásipkerlerge qyzmet kórsetý ortalyqtarynyń konsýltanttary da túsindirý jumystaryna atsalysýda. Onlaın-vebınarlar da ótkizilip jatyr. Bul arqyly 265 myń adamdy qamtý kózdelip otyr.
– Qazirdiń ózinde túsindirý jumystary arqyly 4 myńnan asa kásipkerlik nysanyn aralap, 90 myńǵa jýyq adamdy qamtydyq. Atap aıtqanda, 220 jelilik dúkendi, turǵyn úılerde ornalasqan 1 300 dúkendi, saýda-sattyqpen aınalysatyn 328 nysandy, 200 naryq pen 1 300-den asa basqa da nysandardy araladyq, – dedi Raıymbek Batalov.
Onyń aıtýynsha, dál qazirgi ýaqytta túsindirý jumystaryn júrgizýdiń mańyzy zor. Ásirese, orta, shaǵyn jáne mıkro bıznes sýbektilerinde eńbek etetinderdi qamtý kerek. О́ıtkeni, halyqtyń kóp bóligi dál osy salada shoǵyrlanǵan.
– О́kinishke qaraı, kóp jaǵdaıda bıznestegi adamdar mundaı túsindirý jumystarynan syrt qalyp jatady. Olarǵa eldegi saıası oqıǵalar týraly aqparat ta durys jetkizilmeıdi. Biz bul joly osy olqylyqtyń ornyn toltyrýdy jón kórdik. Onyń ústine ulttyq palatanyń halyqpen jumys isteýde qalyptasqan ózindik tájirıbesi bar, resýrsy da jetkilikti. Túsindirý jumystaryna palatanyń óńirlik fılıaldary, Kásipkerlerge qyzmet kórsetý ortalyqtary tegis jumyldyryldy jáne bul durys qadam boldy dep esepteımin, – deıdi «Atameken» ulttyq kásipkerler palatasynyń tóralqa tóraǵasy.
Onyń pikirinshe, qazirdiń ózinde elimizde oń ózgerister bastaldy. Halyq osynyń bárinen ýaqytyly habardar bolýy kerek.
– Referendým ásheıin naýqan emes. Ol – bolashaǵymyzdy tańdaý. Sondyqtan onyń mańyzdylyǵyn bárimiz túsinýimiz kerek, – deıdi R.Batalov.
Shymkent qalasy Kásipkerler palatasynyń dırektory Nurlan Qabyshtaevtyń aıtýynsha, halyqty referendýmǵa shaqyrý, Konstıtýsııaǵa enetin ózgeristerdi halyqqa túsindirý jumystary úshinshi megapolıste de qarqyndy júrip jatyr.
– Osy aptada shahardaǵy iri saýda oryndary men úı irgesinde ornalasqan dúkenderdi araladyq. Halyqtyń deni aldaǵy saıası sharadan habardar. Degenmen ózgeristerdi egjeı-tegjeı túsindirýge tyrystyq. Shyn máninde, bul referendýmda halyqtyq azamattyq belsendiligi baıqalatyn bolady. Sondyqtan oǵan bıznes ókilderi de tegis qatysady. Jańa Qazaqstan – jalań uran emes. Ol jańa hám ádiletti qoǵam qurý qaǵıdaty. Demek halyq óz pikirin ashyq aıtýy kerek. Soǵan berilgen úlken múmkindiktiń biri – aldaǵy referendým. Ondaǵy ózgeristerdiń aýqymyn eskersek, referendýmǵa el turǵyndarynyń tegis qatysýy mańyzdy, – deıdi Nurlan Qabyshtaev.
«Básekelestik saıasatty damytý jáne qorǵaý ortalyǵy» AQ vıse-prezıdenti, konstıtýsııalyq reformalardy túsindirý máseleleri jónindegi respýblıkalyq shtabtyń múshesi Marat Mustafınniń pikirinshe, halyq, onyń ishinde bıznes ókilderi bul referendýmdy uzaq kútti.
– Qańtar qasireti eldegi ózgeristerge jol ashty. Bul ózgeristerdi bıznes te uzaq kútti. Ásirese shaǵyn jáne orta bıznes. Osy kúnge deıin iri bızneske erekshe nazar aýdarylyp keldi de, shaǵyn jáne orta kásipkerlikke bertin ǵana mán berile bastady. Al damyǵan elder el ekonomıkasyndaǵy shaǵyn jáne orta bıznestiń úlesin arttyrýǵa tyrysady. Sebebi ekonomıkany kóteretin de sol sektor. Menińshe, aldaǵy ózgeristerden soń, eldegi kásipkerlik salasynyń tynysy ashylady. Sondyqtan aldaǵy referendýmnan úlken úmit kútemiz, – deıdi Marat Mustafın.
