Kózge túrtse kórinbeıtin qoıý tútin páter ishine keptelip qalypty. Túrtpektep júrip jol tapqan. Dálizde adam qarasy baıqalmady. Ilgeri ozǵan. Bir kezde as úıdegi gaz ballony qolyna ilikti. Sýmańdaǵan jalyn tili sál keshikse, ballondy sharpıtyndaı. Ot tıisimen jarylýy ábden múmkin. Jalma-jan aǵytyp, terezeden shyǵardy. Oqıǵa ornyn muqııat zerttegeni abyroı bolypty. Jatyn bólmede es-tússiz, sulyq jatqan adam bar eken. Qolqany qapqan qoıý ashy tútinge ýlanyp qalǵan. О́z betimen shyǵa alar túri joq.
Kókshetaý qalalyq №10 órt sóndirý bólimshesiniń qaraýyl bastyǵy Ádilet Serik kezekshi bólimge habar túskennen keıin Gastello kóshesindegi №6 úıge attanǵan. Osy oqıǵanyń órbýi jadynda jattalyp qalypty.
– Bir órt sóndirý esebimen oqıǵa ornyna lezde jettim, – deıdi Ádilet Altynbekuly. – Kelsek, úı janyp jatyr eken. Temir esikti buzý uzaq ýaqyt alar edi, terezeden kirgen jyldamdaý. Jeke quramǵa órttiń jaıylyp ketpeýin qadaǵalaý týraly tapsyrma berdim de, páterge terezeden endik. О́rtengen úı ishinde adam bolýy da yqtımal. Aldymen, qaýipke dýshar bolǵandardy qutqarǵan lázim. Tynystaý apparatyn kıgenniń ózinde qoıý qara tútin túk kórsetpeıdi. Qarmanyp júrip taptyq. Janymdaǵy qutqarý qyzmetiniń aǵa serjanty Álimjan Mustafın ekeýmiz es-tússiz jatqan adamdy dalaǵa alyp shyqtyq. Kórer jaryǵy bar eken, aman qaldy.
Oqıǵa ornyna shaqyrylǵan jedel járdem qyzmeti ile jetip, tútinge tunshyǵyp, endi bolmaǵanda otqa orana jazdaǵan adamdy aýrýhanaǵa jetkizgen. Osylaısha, órt sóndirýshiler adam ómirin saqtap qaldy. Qyzyl jalynnyń qurbany bolǵan dúnıe-múlik sadaqa. Eń bastysy, adamnyń aman qalǵany.
Taǵy bir joly Borovskoı shaǵyn aýdanyndaǵy №56 úıde órt shyqty degen sýyq habar túsken. Bul kez sáýir aıy edi. Oqys oqıǵa kópqabatty úıdiń birinshi qabatynda oryn alypty. Bul joly da temir esiktiń topsasyn buzýǵa ýaqyt kóp ketedi dep eseptegen. Jalma-jan úıdi aınalyp kórse, birinshi qabattaǵy balkonnan syzdyqtap tútin shyǵyp tur. Qol satymen kóterilgen. Sý shashar oqpandy alyp, qyzyl jalynnan qorǵaıtyn arnaıy jeńderdi kıip, terezeni syndyrǵan kezde páterdiń ishinde keptelip turǵan qoıý qara tútinmen jalǵasa ystyq jalyn lap ete tústi. Ishki túısik áldebir qaýipten habar bergendeı. Ishte adam bolýy ábden múmkin. Aǵa serjant Oljas Oqapov ekeýi lezde tapqan. Kereýettiń janynda basyn kótere almaı búk túsip jatyr eken. Abyroı bolǵanda qara tútin tóbege jınalǵanymen, tómende talǵajaý bolar aýa bar eken. Sonyń ózinde qas qaǵym sát keshikse, áldeqandaı jaǵdaı bolar edi. Qoltyǵynan demep, ekeýlep kóterip, alyp shyqty. Sóıtip taǵy da bir adam ómiriniń aman qalýyna sebepshi boldy.
– Júrek qalaýymen tańdaǵan mamandyǵymyz bolǵannan keıin qaýip-qaterge etimiz úırengen, – deıdi Ádilet Serik. – Bul bizdiń jumysymyz ǵoı. Biz istemesek, kim isteıdi?!
Taıaýda oblys ortalyǵyndaǵy E.Áýelbekov kóshesindegi kópqabatty úıdi órt shalypty. Tórt birdeı balkon uıytqı soqqan jel ekpinimen laýlaǵan qyzyl órtke oranǵan. О́rt sóndirýshiler oqıǵa ornyna jetken kezde qulaq tundyratyn jarylys ta bolyp jatyr. Taǵy da tereze arqyly kirý qajet boldy. Áýeli úsh ıindi qol satyny ornatqan. Joǵary qabatta bolǵan soń bir satymen boıy jetpeı, ekinshi satyny jalǵaýǵa týra keldi. Qarbalasa júrip qyzyl jalynnyń betin qaıtarǵan.
Endi keıipkerimiz týraly bir aýyz sóz aıta ketelik. Ádilet Serik Býrabaı aýdanyna qarasty Mádenıet aýylynyń týmasy. 2015 jyly Tótenshe jaǵdaılar mınıstrligi Kókshetaý tehnıkalyq ınstıtýtyn úzdik bitirgen. Keıin Sh.Ýálıhanov atyndaǵy Kókshetaý ýnıversıtetiniń ómir tirshilik negizderi fakýltetin úzdik aıaqtap, magıstratýrada bilim alýda. Dıplomdy sý tasqynynyń aldyn alý taqyrybynan úzdik qorǵaǵan. Eń joǵary balǵa ıe bolypty.
Kókshetaý óńiri keıingi jyldary sý tasqynynyń zardabyn tartyp kele jatyr. Jas maman Atbasar, Astrahan, Sandyqtaý aýdandaryndaǵy Jabaı, Kolýton ózenderiniń kóktemgi tasý sebepterin zerdelegen, aldyn alý sharalaryn oılastyrǵan. Aıtalyq, sýda ósetin ósimdikterdiń shirindige aınalyp, shógip qalýy tabıǵı sebep bolsa, adam qolymen jasalatyn kedergiler de oryn alýda. Máselen, ózenge kópir ornatý úshin júk mashınalary ótetin etip topyraq tógip, jol jasaıdy. Keıin jumys bitken soń qurylysshylar ózderi salǵan ýaqytsha joldy jınamaı ketedi. Sýdyń erkin aǵýyna bóget bolatyn osyndaı da jaı bar. Jas mamannyń tapqan jańalyǵy kópir astyna arnaıy qondyrǵy ornatý. Qar sýymen meltektegen ózen deńgeıi qondyrǵyǵa jetken kezde mobıldik qosymsha arqyly habar túsedi. Qaýipti jaǵdaıdan qulaqtanǵan turǵyndar saqtyq qamyn jasamaq.
Bir ózi birneshe adamnyń ómirin saqtap qalǵan órt sóndirýshi ójet qımyly úshin mınıstrlik, departament tarapynan áldeneshe ret marapatqa ıe bolypty. О́z aıtýyna qaraǵanda, eń úlken marapat ómirlerin saqtap qalǵan adamdardyń jalǵyz aýyz alǵysy. Odan artyq eshteńe tilemeıdi de.
Kókshetaý
