– Egin alqaptaryn qurt, kóbelekterdiń qaptaýy 30 jyldan keıin qaıtalanyp otyr. Qazir Batys Qazaqstan oblysynan ýlaý jumystaryn júrgizetin arnaıy mekeme men mamandar shaqyryldy. Egin alqaptaryn ýlaý jumysy bastaldy. Qurt, kóbelekterdiń qansha gektar aýmaqqa jaıylǵany belgisiz. Bul anyqtalyp jatyr. Bizdiń basty maqsatymyz – zııankesten eginshilerdiń egin alqabyn, odan keıin jaıylymdyq jerdi qorǵaý. Jalpy qurt, kóbelekter 2020 jylǵa deıin óńdeletin zııankes jándikterdiń tizbesinde bolǵan edi. Sol jyly ony tizbeden alyp tastady. Bıyl zııankester tizbesine qaıta qosý máselesi qarastyrylyp otyr. Eger óńdeletin zııankester tizbesine engiziletin bolsa, jergilikti bıýdjetten qarjy bólý máselesi qarastyrylady, – deıdi Qaırat Nurlybaev.
Onyń málimetine súıensek, óńirde egin egýmen aınalysatyn 300-den astam sharýashylyq bar. Qazir onyń 100-ge jýyǵy shalǵyn kóbeleginen zardap shekken.
– Aýdandarda qalyptasqan jaǵdaıǵa baılanysty zııankesterdiń zardabyn jedel joıý jumysy qolǵa alyndy. Oral qalasynan kelgen ýlaý dári-dármegin shashýmen aınalysatyn 2 kólik kúnine shamamen 1000 gektardan astam aýmaqty qamtıdy. Atalǵan jumysqa jergilikti bıýdjetten shamamen 8-10 mln teńge kóleminde qarjy bólý qarastyrylyp otyr. Eger ýlaıtyn aýmaqtyń kólemi artsa, qosymsha qarjy bólý máselesi pysyqtalady, – deıdi oblys ákiminiń orynbasary.
Osyǵan uqsas jaıt mamyr aıynda Qyzylqoǵa aýdanynda tirkelgen edi. Munda jýsan qurtynan 800 gektar jaıylym zaqymdandy. Agroónerkásip keshenindegi memlekettik ınspeksııa komıteti Atyraý oblystyq aýmaqtyq ınspeksııasynyń bólim basshysy Ábıla Qazıevanyń aıtýynsha, bul aýdanda ár jyldary mundaı zııankes kezdesip júr.
– Alaıda jaıylymǵa zııankesterdiń zııany tımegen edi. Al bıyl 800 gektar jaıylymda jýsan jemiriniń dernásili ártúrli jas satysynda ekeni anyqtaldy. Máselen, Saǵyz aýyldyq okrýgindegi «Ánet», «Alyp Ana» sharýa qojalyqtarynyń árqaısysyna tıesili – 200, «Toshıı» sharýa qojalyǵynyń – 100, Muqyr aýyldyq okrýginde tirkelgen «Qyzyl bulaq» sharýa qojalyǵynyń 100 gektar jaıylymy jýsan jemirinen zaqymdanǵany anyqtalyp otyr. Sondaı-aq «Saǵyz – Mııaly» baǵytyndaǵy joldyń boıynda ornalasqan Sarqýjaq ýchaskesinde de 100 gektar jaıylymdyq alqapqa zııan keldi, – deıdi Ábıla Qazıeva.
Onyń aıtýyna qaraǵanda, sharýa qojalyqtary mundaı zııankesterge qarsy kúres is-sharasyn óz qarajaty esebinen júrgizýi kerek.
Atyraý oblysy
