Ulttar lıgasynyń jerebesi tartylǵan sátten bastap keshegi kúnge deıin Ázerbaıjan men Belarýs quramalarynyń bas bapkerleri de, barsha fýtbol mamandary da Slovakııany «S» lıgasynyń negizgi favorıti ekenin aıtqan bolatyn. Keshegi match aldyndaǵy baspasóz máslıhatynda Magomed Adıev te Slovakııa quramasynyń oıynyn joǵary baǵalap, kezdesý qazaqstandyqtar úshin óte qıynǵa soǵatynyn málimdegen edi. Degenmen M.Adıev Eýropanyń TOP-5 chempıonattarynda óner kórsetetin tájirıbeli fýtbolshylardan jasaqtalǵan Shtefan Tarkovıch shákirtterin jeńip, óziniń myqty motıvator, strateg ekenin kórsetti.
Bir elden ekinshi elge ushý, 90 mınýt boıy alańda júgirý fýtbolshylar úshin ońaıǵa soqpaıtyny belgili. Sondyqtan M.Adıev keshegi oıynda negizgi quramǵa azdaǵan ózgeris jasady. Alǵashqy týrda jaraqat alǵan Ashat Taǵybergenniń ornyna Islambek Qýat shyqsa, qorǵaýshylar Tımýr Dosmaǵambetov, Mıhaıl Gabyshev, Sergeı Malyı birinshi mınýttan bastap negizgi quramnan oryn aldy. Sondaı-aq Ázerbaıjanmen ótken oıynda mamandar kózine túsken Ramazan Orazov ta keshegi kezdesýde sol qaptaldyń shabýylyna jaýapty boldy. Olar Eldos Ahmetov, Baýyrjan Baıtana, Iаn Vorogovskıı jáne Baǵdat Qaıyrovty almastyrdy. Negizgi quramnyń ózge oıynshylary ózgerissiz qaldy.
Al Slovakııa sapynda Italııa chempıonatynda dop tebetin alyp deneli qorǵaýshy ári qurama kapıtany Mılan Shkrınıar («Inter») men jartylaı qorǵaýshy Stanıslav Lobotka («Napolı»), APL klýbtarynda óner kórsetetin qaqpashy Marek Rodak («Fýlhem») pen «Ýotfordtyq» jartylaı qorǵaýshysy Iýraı Kýska sekildi tisqaqqan fýtbolshylar oıyn barysynda Igor Shaskıı qorǵaǵan qaqpadan sańylaý tabýǵa tyrysty.
Trnavadaǵy «Sıtı Arena» stadıonynda ótken matchyń alǵashqy mınýttarynda Qazaqstan quramasy alań ıelerin ábden sastyrdy. Kezdesýdiń nebári ekinshi mınýtynda qorǵaýshy Sergeı Malyı aıyp alańynyń ishinen qaqpaǵa baspen soqqy baǵyttap, qaqpashy Marek Rodaktyń qyraǵylyǵyn bir tekserip kórdi. Arada birer mınýt ótkende alǵashqy týrdyń qaharmanyna aınalǵan Abat Aıymbetov kezekti múmkindikti múlt jiberip, gol soǵa almady. Onyń soqqysy qaqpadan bıik ketti. Slovakııalyqtar da alǵashqy taımda Igor Shaskıı qorǵaǵan qaqpaǵa álsin-álsin shabýyl uıymdastyrýǵa tyrysqanymen, 45 mınýt boıy birde-bir dál soqqy jasaı almady. Esesine, kezdesýdiń 26-mınýtynda ulttyq quramanyń jas fýtbolshylary Ramazan Orazov pen Elhan Astanovtyń shyǵarǵan pasynan keıin Aslan Darabaev gol soǵyp, oıynnyń esebin ashty – 0:1. Alań ıeleri birinshi taımnyń sońyna deıin tarazy basyn teńestirýge tyrysqanymen, Almashı men Rýsnak shabýyldaryn nátıjeli aıaqtaı almady.
Úzilisten keıin Shtefan Tarkovıch quramasynyń shabýylyn kúsheıtip, alańǵa eki jartylaı qorǵaýshynyń ornyna bir shabýylshy men bir jartylaı qorǵaýshy shyǵardy. Sóıtip, alań ıeleriniń oıyny biraz jandanǵandaı boldy. Tipti ekinshi taımnyń bel ortasynan aýa slovakııalyqtardyń shabýyly údeı tústi. 77-mınýtta Ladıslav Almashı gol soǵyp, esepti teńestirgen edi. Biraq kezdesýdiń bas tóreshisi Krısto Tohver gol soǵylardan buryn alań ıeleriniń biri Samat Jarymbetovke qarsy oıyn erejesin buzdy dep eseptep, VAR júıesine júgindi. Beıneqaıtalaýdan keıin tóreshi fol tirkep, Slovakııanyń golyn esepke alǵan joq. Qalǵan 10-15 mınýtta slovakııalyq fýtbolshylar qaýipti eshteńe isteı almady. Osylaısha, Qazaqstan quramasy syrt alańda Slovakııa quramasyn san soqtyryp, sensasııa jasady. Bir aıta keterligi, bul eki qurama arasyndaǵy alǵashqy resmı kezdesý bolatyn.
Al bizdiń toptaǵy ekinshi matchta Belarýs pen Ázerbaıjan quramalary teń oınap (0:0), ekeýi de alǵashqy upaılaryna qol jetkizdi. Sóıtip, eki týrda 100 paıyzdyq nátıjemen Qazaqstan quramasy óz tobynda jeke-dara kósh bastady. Eki matchta úsh upaı alǵan Slovakııa ekinshi ornyn saqtap qalsa, Belarýs pen Ázerbaıjan bir-bir upaımen sońǵy eki oryndardy ózara bólisip tur.
Mogamed Adıev shákirtteri kelesi kezdesýin 10 maýsym kúni Serbııanyń Novı-Sad qalasynda Belarýs quramasymen ótkizedi. Bul matchtan keıin ulttyq qurama elge oralyp, 13 maýsymda óz alańynda Slovakııany qabyldaıdy.
