Azattyqtyń qadirin elin súıgen erler ǵana tereń túsinedi. Sonaý kóne zamandardan búginge jalǵasqan tirshiligimizde halqymyz orda tutqan Ordabazar, Balasaǵun, Saraıshyq, Saýran, Túrkistan sııaqty talaı tarıhı qalalar boldy. Alaıda Táýelsizdiktiń týyn tige salysymen Tuńǵysh Prezıdentimiz Nursultan Ábishulynyń bastaýymen Alataýdan Arqaǵa kóshken astananyń jóni bólek. Otyz jyl ishinde irgemizdi bekitip, eńsemizdi tiktedik. Qazaqty álem tanydy. Ras, aýmaly-tókpeli, bılikke ókpeli alasapyran kúnder de ótti.
Tarıh biryńǵaı jarqyn betterden turmaıdy. Basymyzdan ótken otyz jyl ózgeniń emes ózimizdiń tarıhymyz. Ony ádil baǵalaı bilgenimiz jón. «Jańa Qazaqstan» búginnen bastalǵanymen, keshegi kúnniń zańdy jalǵasy.
Osy turǵydan alǵanda bıylǵy jyr dodasy da tartysty ótti. Múshaıraǵa úmitker 60 shyǵarma tústi. Aqyndarymyz sońǵy jyldary bolyp jatqan jaǵdaılarǵa qaramastan, qıyn taqyryptyń qııýyn tapqandary qýantty.
Memlekettik syılyqtyń laýreaty, aqyn Nesipbek Aıtuly bastaǵan Qazaqstan Jazýshylar odaǵy basqarmasy tóraǵasynyń orynbasary Baýyrjan Jaqyp, «Alash» syılyǵynyń laýreaty Ǵalym Jaılybaı, Nur-Sultan qalasyndaǵy Qazaqstan Jazýshylar odaǵynyń fılıalynyń dırektory, «Daryn» jastar syılyǵynyń laýreaty, aqyn Dáýletkereı Kápuly, «Alash» syılyǵynyń laýreaty, «Túrkistan» gazetiniń bas redaktory, aqyn Baýyrjan Babajanuly syndy qazylar alqasynyń quramy báıgege túsken shyǵarmalardy saralaı, saraptaı kele júldegerlerdi anyqtady:
Bas júldeni – elordalyq aqyn, «Mahambet», «Tólegen Aıbergenov» atyndaǵy syılyqtarynyń laýreaty Ońaıgúl Turjan «Elordamen syrlasý» atty óleńder toptamasymen qanjyǵasyna baılandy.
Birinshi oryndy – elordalyq aqyn Serikzat Dúısenǵazy «Eńsesi bıik Elorda» atty tolǵaýymen enshiledi.
Ekinshi eki oryndy – elordalyq aqyn Janat Áskerbekqyzy «Astanam» óleńder toptamasymen jáne Pavlodarlyq jas aqyn Baqbergen Darıǵa «Kenesarynyń monology» atty óleńimen ıelendi.
Úshinshi oryn úsh oryndy – Almatylyq aqyndar Ásel Ospan «Astananyń áz jurty», Muratqan Shoqan «Kósheń tolyp jatsyn gúlge, kúlkige» toptamasymen, elordalyq aqyn Aýyt Muqıbek «Elordam meniń - baq ordam» óleńimen aldy.
Bes yntalandyrý syılyǵy – Kókshetaýlyq aqyn Muhamed Qonqaev jáne elordalyq aqyndar Sherhan Talap, Dúısenáli Álimaqyn, Muqııat Qoıshybaı, Kádirhan Qızatqa buıyrdy.
Júldegerlerdi marapattaý osy jyly shildeniń 1 kúni saǵat 15:00 de Nur-Sultan qalasy, «Jastar» saraıynda ótedi.
